കടലില്‍ നിന്ന് കുടിവെള്ളമെടുക്കാന്‍ സംവിധാനവുമായി ശാസ്ത്രജ്ഞര്‍

ചെന്നൈ: രാജ്യം കടുത്ത ജലക്ഷാമം നേരിടുമ്പോള്‍ കടല്‍വെള്ളം ഉപയോഗപ്പെടുത്തുന്നതിന് നൂതന മാര്‍ഗം വികസിപ്പിച്ചതായി തമിഴ്‌നാട്ടിലെ ശാസ്ത്രജ്ഞര്‍. കല്‍പ്പാക്കം ഭാഭ ആറ്റോമിക് റിസര്‍ച്ച് സെന്ററിലെ (ബാര്‍ക്) ശാസ്ത്രജ്ഞരാണ് കടല്‍ജലം ശുദ്ധീകരിച്ച് കുടിവെള്ളമായി ഉപയോഗപ്പെടുത്തുന്നതിനുള്ള സംവിധാനം വികസിപ്പിച്ചെടുത്തത്. ഭൂഗര്‍ഭജലത്തിലെ ആര്‍സെനിക്, യുറാനിയം സാന്നിധ്യവും ഈ മാര്‍ഗത്തിലൂടെ വേര്‍തിരിച്ചെടുക്കാനാകും.
ആണവനിലയത്തില്‍ നിന്ന് പുറന്തള്ളുന്ന നീരാവി ഉപയോഗിച്ച് പ്രതിദിനം 6.3 ദശലക്ഷം ലിറ്റര്‍ കടല്‍വെള്ളം ശുദ്ധീകരിക്കാനാകും. ഈ രീതി അവലംബിച്ച് കടുത്ത വരള്‍ച്ച നേരിടുന്ന 13 സംസ്ഥാനങ്ങള്‍ക്ക് വെള്ളമെത്തിക്കാനാകുമെന്നാണ് വിലയിരുത്തല്‍. പഞ്ചാബിലും പശ്ചിമ ബംഗാളിലും ഇത്തരത്തിലുള്ള പ്ലാന്റുകള്‍ സ്ഥാപിച്ചുകഴിഞ്ഞു. വരള്‍ച്ച ഏറ്റവും രൂക്ഷമായ മഹാരാഷ്ട്രയിലെ മറാത്ത്‌വാഡ മേഖലയിലേക്കായി വീടുകളില്‍ ഉപയോഗിക്കാവുന്ന തരത്തിലുള്ള ചെറു ശുദ്ധീകരണ ഉപകരങ്ങളും ബാര്‍ക്കിലെ ശാസ്ത്രജ്ഞര്‍ നിര്‍മിച്ചുനല്‍കിയിരുന്നു.