സൈനിക സ്‌കൂള്‍ ഹോസ്റ്റലില്‍ നിന്ന് കാണാതായ 13 കാരനെ പൂനെയില്‍ നിന്നും തിരിച്ചെത്തിച്ചു

കോഴിക്കോട്| കോഴിക്കോട് വേദവ്യാസ സൈനിക സ്‌കൂളില്‍ നിന്നും ചാടിപ്പോയ ബീഹാര്‍ സ്വദേശിയായ പതിമൂന്നുകാരനെ പൂനെയില്‍ നിന്നും തിരിച്ചെത്തിച്ചു. ഒളിച്ചോടിപ്പോയി എട്ട് ദിവസത്തിനുശേഷം പൂനെയില്‍ നിന്നാണ് കഴിഞ്ഞ ദിവസം കുട്ടിയെ കണ്ടെത്തിയത്. റെയില്‍വേ സ്റ്റേഷനോട് ചേര്‍ന്നുള്ള ഒരു ഹോട്ടലില്‍ 13കാരന്‍ ജോലിക്ക് നില്‍ക്കുകയായിരുന്നു. കുട്ടിയെ കോടതിയില്‍ ഹാജരാക്കിയ ശേഷം ബന്ധുക്കള്‍ക്ക് വിട്ടു നല്‍കും.

വേദവ്യാസ സൈനിക സ്‌കൂള്‍ ഹോസ്റ്റലില്‍ നിന്നും ഈ മാസം 24 നാണ് ബീഹാര്‍ സ്വദേശിയായ 13 കാരന്‍ ചാടിപ്പോയത്. സന്‍സ്‌കാര്‍ കുമാര്‍ എന്ന കുട്ടിയാണ് ഹോസ്റ്റലില്‍ നിന്ന് അതിസാഹസികമായി ചാടിപ്പോയത്. പുലര്‍ച്ചെ ഒരു മണിയോടെയാണ് കുട്ടി ഹോസ്റ്റലിന്റെ ഒന്നാം നിലയില്‍ നിന്നും രക്ഷപ്പെട്ടത്. കേബിളില്‍ പിടിച്ചിറങ്ങിയ കുട്ടി താഴേക്ക് എറിഞ്ഞ കിടക്കയിലേക്ക് ചാടുകയായിരുന്നു.

24ാം തിയതി പാലക്കാട് നിന്ന് കന്യാകുമാരി -പൂനെ എക്‌സ്പ്രസില്‍ കുട്ടി കയറിയതിന്റെ വിവരം പോലീസിന് ലഭിച്ചിരുന്നു. സിസിടിവി ദൃശ്യങ്ങളടക്കം പരിശോധിച്ച് നടത്തിയ അന്വേഷണത്തിലാണ് കുട്ടിയെ പൂനെയില്‍ നിന്ന് പോലീസിന് കണ്ടെത്താനായത്. പൂനെയില്‍ പോകുമെന്ന് കുട്ടി നേരത്തെ സഹപാഠികളോട് പറഞ്ഞിരുന്നു. രണ്ട് ദിവസം മുമ്പാണ് കുട്ടി പാലക്കാട് നിന്നും ട്രെയിന്‍ കയറുന്നതിന്റെ ദൃശ്യങ്ങള്‍ പോലീസിന് ലഭിക്കുന്നത്. ഇതാണ് കുട്ടിയെ കണ്ടെത്താന്‍ സഹായിച്ചത്.