താമരശ്ശേരിയില്‍ 13 വയസുകാരിയെ കാണാതായ സംഭവം; ബന്ധുവായ യുവാവ് അറസ്റ്റില്‍

കോഴിക്കോട്|കോഴിക്കോട് താമരശ്ശേരിയില്‍ 13കാരിയെ കാണാതായ സംഭവത്തില്‍ ബന്ധുവായ യുവാവ് അറസ്റ്റില്‍. കുട്ടിയുടെ മൊഴിയുടെ അടിസ്ഥാനത്തില്‍ യുവാവിനെതിരെ പോക്‌സോ ഉള്‍പ്പെടെയുള്ള വകുപ്പുകള്‍ ചുമത്തി. യുവാവിനെ താമരശ്ശേരി കോടതിയില്‍ ഹാജരാക്കും. കുട്ടിയെ ഇന്ന് ജെ ജെ ബോര്‍ഡിന് മുന്നില്‍ ഹാജരാക്കും. കുട്ടിയുടെ മൊഴിയെടുത്ത ശേഷമാണ് യുവാവിന്റെ അറസ്റ്റ് രേഖപ്പെടുത്തിയത്.

പെണ്‍കുട്ടിയെയും ബന്ധുവായ യുവാവിനെയും ഇന്നലെ പുലര്‍ച്ചെ ബെംഗളുരുവില്‍ വെച്ചാണ് കര്‍ണാടക പോലീസ് കണ്ടെത്തിയത്. കര്‍ണാടക പോലീസാണ് ഇവരെ കണ്ടെത്തിയ വിവരം കേരള പോലീസിനെ അറിയിച്ചത്. തുടര്‍ന്ന് ഇരുവരെയും അന്വേഷണ സംഘം ഇന്നലെ രാത്രി ഏഴോടെ താമരശ്ശേരിയിലെത്തിച്ചു.

പോക്‌സോ കേസില്‍ ജയിലിലായിരുന്ന യുവാവ് ജാമ്യത്തിലിറങ്ങിയ ശേഷം ഇരയായ പെണ്‍കുട്ടിയെ ഭീഷണിപ്പെടുത്തി തട്ടിക്കൊണ്ടു പോവുകയായിരുന്നുവെന്ന് കുടുംബം പറഞ്ഞു. പരാതി പിന്‍വലിക്കണമെന്നാവശ്യപ്പെട്ട് യുവാവ് നിരന്തരം ഭീഷണിപ്പെടത്തിയിരുന്നതായും പെണ്‍കുട്ടിയുടെ മാതാവ് പറഞ്ഞിരുന്നു. സംഭവത്തില്‍ സമഗ്ര അന്വേഷണം വേണമെന്നും കുടുംബം ആവശ്യപ്പെട്ടു.

കഴിഞ്ഞ ചൊവ്വാഴ്ച പരീക്ഷക്കായി സ്‌കൂളില്‍ പോയ എട്ടാം ക്ലാസ് വിദ്യാര്‍ത്ഥിയെയാണ് യുവാവ് തട്ടിക്കൊണ്ടുപോയത്. പോലീസ് നടത്തിയ അന്വേഷണത്തില്‍ ബന്ധുവായ യുവാവിനൊപ്പം കുട്ടി തൃശൂരിലെത്തിയതായി കണ്ടെത്തിയിരുന്നു. ഇരുവരുടേയും തൃശൂരില്‍ നിന്നുള്ള സിസിടിവി ദൃശ്യങ്ങളും ലഭിച്ചിരുന്നു. അന്വേഷണം മറ്റു സംസ്ഥാനങ്ങളിലേക്കും വ്യാപിച്ചതിനു പിന്നാലെയാണ് ബെംഗളുരുവില്‍ വെച്ച് കര്‍ണാടക പോലീസ് ഇവരെ കണ്ടെത്തിയത്.