അവിശ്വാസം കൊണ്ട് പ്രതിപക്ഷം എന്ത് നേടി?

ദേശീയ രാഷ്ട്രീയത്തിൽ കോൺഗ്രസിന്റെ പടലപ്പിണക്കങ്ങളും നേതാക്കൾ തമ്മിലുള്ള അവിശ്വാസവും പരാമർശിച്ചുകൊണ്ടാണ് അദ്ദേഹം മറുപടി ആരംഭിച്ചത്. തുടർന്ന് സർക്കാരിന്റെ നേട്ടങ്ങൾ അക്കമിട്ടു നിരത്തി. സകല ടെലിവിഷൻ ചാനലിലും ലൈവ്. വിശദമായി ക്ലാസെടുക്കുന്നതുപോലെയുള്ള അവതരണം. സോഷ്യൽ മീഡിയയിൽ സൂപ്പർഹിറ്റായി പരക്കുന്നത് ഭരണപക്ഷത്തുള്ളവരുടെ പ്രസംഗങ്ങൾ.

യഥാർത്ഥത്തിൽ മുഖ്യമന്ത്രിയുടെ മൂന്നരമണിക്കൂർ പ്രസംഗത്തിൽ അരമണിക്കൂറേ സോപ്പുകുമിള ആരോപണങ്ങൾക്കു മറുപടിയായി ഉണ്ടായിരുന്നുള്ളൂ. അരമണിക്കൂർ രാഷ്ട്രീയം. ബാക്കി രണ്ടരമണിക്കൂർ ഈ സർക്കാരിന്റെ നേട്ടങ്ങൾ. ഇതുപോലെ സമഗ്രമായി സർക്കാരിന്റെ നേട്ടങ്ങൾ സഭയിലും ജനങ്ങൾക്കു മുന്നിലും അവതരിപ്പിക്കാൻ കിട്ടിയ അവസരമായി മാറി. ഞങ്ങൾ ഇതാണ് ജനങ്ങളോടു പറയാൻ പോകുന്നത്. മുഖ്യധാര മാധ്യങ്ങൾക്കു മുക്കിക്കളയാവുന്നതല്ല എൽഡിഎഫിന്റെ ഭരണനേട്ടം.

ഈ അവിശ്വാസം കൊണ്ട് പ്രതിപക്ഷം എന്താണ് നേടിയത്? നിലവാരമില്ലാത്ത പ്രസംഗങ്ങളും അടിസ്ഥാനമില്ലാത്ത ആരോപണങ്ങളും കൊണ്ട് ജനങ്ങളുടെ അവിശ്വാസത്തിന് പാത്രമായ സ്ഥിതിയിലായി യുഡിഎഫ്. സർക്കാരിന്റെ നേട്ടങ്ങളുടെ നീണ്ടപട്ടിക പ്രതിപക്ഷത്തിന്റെ ആത്മവിശ്വാസത്തെ ഇല്ലാതാക്കിയെന്ന് അവരുടെ അവസാന മണിക്കൂറിലെ പ്രകടനം തെളിയിച്ചു. ഈ അവിശ്വാസ പ്രമേയത്തെ നിയമസഭയിൽ നേരിട്ടത് ഇടതുപക്ഷ ജനാധിപത്യ മുന്നണിക്ക് വലിയ ഊർജ്ജം പകരുമെന്നതു തീർച്ചയാണ്.