ഇടത് സർക്കാർ നടപ്പാക്കിയ സാമ്പത്തിക സംവരണത്തില്‍ ഇ കെ വിഭാഗത്തിന് പരാതിയില്ല; നേതാക്കളുടെ ക്ഷണപ്രകാരം നിവേദന സമര്‍പ്പണ വേളയില്‍ സന്നിഹിതനായെന്നും മന്ത്രി ജലീല്‍

സയ്യിദ് ജിഫ്രി മുത്തുകോയ തങ്ങൾ പ്രസിഡണ്ടും പ്രൊഫ: കെ. ആലിക്കുട്ടി മുസ്ല്യാർ ജനറൽ സെക്രട്ടറിയുമായ കേരളത്തിലെ പണ്ഡിത സഭകളിൽ പ്രഥമ നിരയിൽ ഗണിക്കപ്പെടുന്ന സമസ്ത കേരള ജംഇയത്തുൽ ഉലമയുടെ കീഴിലുള്ള സംവരണ സംരക്ഷണ സമിതിയുടെ ഭാരവാഹികൾ ഇന്ന് മുഖ്യമന്ത്രി ശ്രീ പിണറായി വിജയനെ കണ്ട് നിവേദനം സമർപ്പിച്ചു. മറ്റുള്ളവർക്ക് ന്യായമായത് നൽകുന്നതിൽ സമസ്തക്ക് പരാതിയില്ലെന്നും സംവരണ സമുദായങ്ങൾക്ക് ഇക്കാലമത്രയും ലഭിച്ചുകൊണ്ടിരുന്നതിൽ കുറവുവരാതെ നോക്കണമെന്നും സമസ്ത നേതാക്കൾ മുഖ്യമന്ത്രിയോട് പറഞ്ഞു. എല്ലാം കേട്ട ശ്രീ പിണറായി വിജയൻ സംവരണ സമുദായങ്ങൾക്ക് ഒരു ലവലേശവും ആശങ്ക വേണ്ടെന്ന് സംശയലേശമന്യേ വ്യക്തമാക്കി. മെഡിക്കൽ പി.ജി കോഴ്സിന് SEBC സംവരണം ഉയർത്തുന്നതുമായി ബന്ധപ്പെട്ട വിഷയം നിലവിൽ കേരള സംസ്ഥാന പിന്നോക്ക വിഭാഗ കമ്മീഷൻ്റെ പരിശോധനയിലാണ്. ഇക്കാര്യത്തിൽ കമ്മീഷൻ്റെ ശുപാർശ ലഭ്യമാകുന്ന മുറക്ക് സർക്കാർ നടപടികൾ സ്വീകരിക്കുമെന്നും സംഘത്തിന് മുഖ്യമന്ത്രി ഉറപ്പു നൽകി.