ആഡംബര കാര്‍ പ്രേമികളെ ലക്ഷ്യമിട്ട് മെഴ്‌സിഡസ്, ലംബോര്‍ഗിനി മോഡലുകള്‍ രാജ്യവിപണിയില്‍

ന്യൂഡല്‍ഹി | ആഡംബര പ്രിയക്കാരെ ലക്ഷ്യമിട്ടുള്ള മെഴ്‌സിഡസ് മേബാക് ജിഎല്‍എസ് 600 എസ് യു വി, ലംബോര്‍ഗിനി ഹുറാകാന്‍ ഇവോ ആര്‍ ഡബ്ല്യു ഡി സ്‌പൈഡര്‍ എന്നിവ ഇന്ത്യന്‍ വിപണിയിലെത്തി. 2.43 കോടി രൂപയാണ് മെഴ്‌സിഡസ് മേബാക് ജിഎല്‍എസ് 600ന്റെ എക്‌സ് ഷോറൂം വില. 4.0 ലിറ്റര്‍ വി8 ബൈ-ടര്‍ബോ എന്‍ജിനാണുള്ളത്.

9ജി- ട്രോണിക് ഓട്ടോമാറ്റിക് ട്രാന്‍സ്മിഷനുണ്ട്. പൂജ്യത്തില്‍ നിന്ന് മണിക്കൂറില്‍ 100 കിലോമീറ്റര്‍ വേഗത കൈവരിക്കാന്‍ 4.9 സെക്കന്‍ഡ് മതി. വിശാലമായ ഉള്‍വശം, നാല്- അഞ്ച് സീറ്റര്‍ ഒപ്ഷന്‍, റഫ്രിജറേറ്റര്‍ തുടങ്ങിയവയുമുണ്ട്.

3.54 കോടി രൂപയാണ് ലംബോര്‍ഗിനി ഹുറാകാന്‍ ഇവോയുടെ എക്‌സ് ഷോറൂം വില. മണിക്കൂറില്‍ 50 കിലോമീറ്റര്‍ വേഗതയില്‍ പോകുകയാണെങ്കില്‍ 17 സെക്കന്‍ഡ് കൊണ്ട് സോഫ്റ്റ് ടോപ് ഉയര്‍ത്താനും താഴ്ത്താനും സാധിക്കും. സ്ട്രാഡ, കോഴ്‌സ, സ്‌പോര്‍ട് ഡ്രൈവിംഗ് മോഡുകളുണ്ട്.

5.2 ലിറ്റര്‍ വി10 പെട്രോള്‍ എന്‍ജിനാണുള്ളത്. 7 സ്പീഡ് ഡുവല്‍ ക്ലച്ച് ഓട്ടോമാറ്റിക് ഗിയര്‍ബോക്‌സാണ് വരുന്നത്. പൂജ്യത്തില്‍ നിന്ന് മണിക്കൂറില്‍ 100 കിലോമീറ്റര്‍ വേഗത കൈവരിക്കാന്‍ 3.5 സെക്കന്‍ഡ് മതി.