ഛത്തീസ്ഗഢിൽ 22 നക്സലൈറ്റുകൾ അറസ്റ്റിൽ; സ്ഫോടകവസ്തുക്കൾ പിടിച്ചെടുത്തു

ബിജാപൂർ | ഛത്തീസ്ഗഢിലെ ബിജാപൂർ ജില്ലയിൽ മൂന്ന് വ്യത്യസ്ത സ്ഥലങ്ങളിൽ നിന്നായി 22 നക്സലൈറ്റുകളെ അറസ്റ്റ് ചെയ്തതായും അവരിൽ നിന്ന് സ്ഫോടകവസ്തുക്കൾ പിടിച്ചെടുത്തതായും പോലീസ് അറിയിച്ചു.

സിആർപിഎഫിന്റെ കമാൻഡോ ബറ്റാലിയൻ ഫോർ റിസോല്യൂട്ട് ആക്ഷൻ (കോബ്ര) സംഘവും പ്രാദേശിക പോലീസും ചേർന്ന് നടത്തിയ തെരച്ചിലിനിടെ ചൊവ്വാഴ്ച ഉസൂർ പോലീസ് സ്റ്റേഷൻ പരിധിയിലെ ടെക്മെറ്റ്ല ഗ്രാമത്തിന് സമീപമുള്ള വനത്തിൽ നിന്ന് ഏഴ് നക്സലുകളെ പിടികൂടി.

മറ്റൊരു സംഭവത്തിൽ, ജംഗ്ല പോലീസ് സ്റ്റേഷൻ പരിധിയിലെ ബെൽച്ചാർ ഗ്രാമത്തിലെ കോട്ടകളിൽ നിന്ന് ആറ് നക്സലൈറ്റുകളെയും അറസ്റ്റ് ചെയ്തു. നീൽസ്നർ പോലീസ് സ്റ്റേഷൻ പരിധിയിലെ കാണ്ടാകർക്ക ഗ്രാമത്തിലെ വനത്തിൽ നിന്ന് ഒമ്പത് കേഡർമാരെയും ചൊവ്വാഴ്ച പിടികൂടിയതായി പോലീസ് അറിയിച്ചു. സുരക്ഷാ ഉദ്യോഗസ്ഥരുടെ പ്രത്യേക സംയുക്ത സംഘങ്ങളാണ് ഈ രണ്ട് റെയ്ഡുകളും നടത്തിയത്.

19 നും 45 നും ഇടയിൽ പ്രായമുള്ളവരാണ് അറസ്റ്റിലായ നക്സലൈറ്റുകൾ. ഇവരിൽ നിന്ന് ടിഫിൻ ബോംബുകൾ, ജലാറ്റിൻ സ്റ്റിക്കുകൾ, ഡിറ്റണേറ്ററുകൾ, ഇലക്ട്രിക് വയറുകൾ, ബാറ്ററികൾ, മാവോയിസ്റ്റ് ലഘുലേഖകൾ, മറ്റ് വസ്തുക്കൾ കണ്ടെടുത്തതായും ഉദ്യോഗസ്ഥൻ കൂട്ടിച്ചേർത്തു.