ജയത്തിനായി 5 ബോളില്‍ വേണ്ടത് 28; 5 സിക്സറടിച്ച് റിങ്കു സിംഗ്

അഹ്മദാബാദ് | കളിയിലെ അവസാന അഞ്ച് ബോളും സിക്‌സറിന് പറത്തി ഗുജറാത്ത് ടൈറ്റന്‍സിൻ്റെ കൈവെള്ളയില്‍ നിന്ന് വിജയം കൊത്തിയെടുത്ത് റിങ്കു സിംഗ്. മൂന്ന് വിക്കറ്റിനാണ് കൊൽക്കത്ത നൈറ്റ് റൈഡേഴ്സിൻ്റെ അവിസ്മരണീയ വിജയം.

ആദ്യം ബാറ്റ് ചെയ്ത ഗുജറാത്ത് ടൈറ്റന്‍സ് 4 വിക്കറ്റ് നഷ്ടത്തിലാണ് 204 റണ്‍സ് നേടിയത്. കൊല്‍ക്കത്തയുടെ മറുപടി ബാറ്റിംഗ് 19 ഓവറില്‍ 176 റണ്‍സ് എന്ന നിലയില്‍ പരുങ്ങുന്ന സമയത്താണ് യുവതാരം റിങ്കു സിംഗ് തകര്‍ത്താടിയത്. 17ാം ഓവറില്‍ റാശിദ് ഖാന്‍ നേടിയ ഹാട്രിക്കിന്റെ ബലത്തില്‍ ജയം ഉറപ്പിച്ച് നില്‍ക്കുന്ന സമയത്താണ് വെള്ളിടി പോലെ യു പി അലിഗഢ് സ്വദേശി റിങ്കു സിംഗ് ഗ്രീസില്‍ തകര്‍ത്താടിയത്.

അവസാന ഓവറിലെ ആദ്യ പന്തില്‍ ഉമേശ് യാദവ് സിംഗിളെടുത്ത് റിങ്കുവിന് സ്‌ട്രൈക്ക് കൈമാറിയപ്പോള്‍ ജയത്തിലേക്ക് കൊല്‍ക്കത്തക്ക് 5 പന്തിൽ വേണ്ടത്  28 റണ്‍സായിരുന്നു. എന്നാല്‍, അടുത്ത അഞ്ച് ബോളും തലങ്ങും വിലങ്ങും സിക്‌സറിന് പായിച്ച റിങ്കു ആരെയും വിസ്മയിപ്പിക്കുന്ന തരത്തില്‍ ജയം സ്വന്തമാക്കി.