കരിപ്പൂരില്‍ 3.48 കോടിയുടെ സ്വര്‍ണം പിടികൂടി; നാല് സ്ത്രീകളടക്കം ആറ് പേര്‍ അറസ്റ്റില്‍

കോഴിക്കോട്  | കരിപ്പൂര്‍ വിമാനത്താവളം വഴി കടത്താന്‍ ശ്രമിച്ച 3.48 കോടിയുടെ സ്വര്‍ണം പിടികൂടി. സംഭവത്തില്‍ നാല് സ്ത്രീകളടക്കം ആറ് പേരെ കസ്‌ററ്റംസ് അറസ്റ്റ് ചെയ്തു. ഇവരില്‍ നിന്നും 4.82 കിലോ ഗ്രാം സ്വര്‍ണ്ണം ആണ് പിടികൂടിയിരിക്കുന്നത്.

ജിദ്ദയില്‍ നിന്നെത്തിയ മലപ്പുറം കൂരാട് സ്വദേശിയും കോഴിക്കോട് ചോമ്പാല സ്വദേശിയുമാണ് ആദ്യം സ്വര്‍ണവുമായി പിടിയിലായത്. ശരീരത്തില്‍ ഒളിപ്പിച്ച നിലയില്‍ 1.19 കിലോ ഗ്രാം സ്വര്‍ണ്ണം ഇവരില്‍ നിന്നും കണ്ടെടുത്തു.അബുദാബിയില്‍ നിന്നെത്തിയ കുറ്റ്യാടി വേളം സ്വദേശിയായ യുവതിയില്‍ നിന്ന് 1.31 കിലോ ഗ്രാം സ്വര്‍ണ്ണവും കണ്ടെടുത്തു. അടിവസ്ത്രത്തില്‍ ഒളിപ്പിച്ചാണ് ഇവര്‍ സ്വര്‍ണ്ണം കൊണ്ടുവന്നത്.ഷാര്‍ജയില്‍ നിന്നെത്തിയ കോഴിക്കോട് സ്വദേശികളായ മൂന്ന് യുവതികളും ഇതിന് പിന്നാലെ പിടിയിലായി. വസ്ത്രത്തിലും ഷൂവിലും ഒളിപ്പിച്ചാണ് ഇവരും സ്വര്‍ണ്ണം കടത്തിയത്. ഇവരെ കസ്റ്റംസ് ചോദ്യം ചെയ്തു വരികയാണ്.