'പാര്‍ട്ടി സമ്മേളനങ്ങള്‍ വിമര്‍ശത്തിനും നവീകരണത്തിനും; പി പി ദിവ്യ തെറ്റ് ചെയ്തു'

കൊല്ലം |  വിമര്‍ശങ്ങള്‍ ഉള്‍ക്കൊണ്ട് തിരുത്തല്‍ വരുത്തി മുന്നോട്ട് പോകുമെന്ന് സിപിഎം സംസ്ഥാന സെക്രട്ടറി എം വി ഗോവിന്ദന്‍. പാര്‍ട്ടി സമ്മേളനങ്ങള്‍ സ്വയം വിമര്‍ശനത്തിനും നവീകരണത്തിനും വേണ്ടിയാണെന്നും ചര്‍ച്ചകളും വിമര്‍ശനങ്ങളും ഉണ്ടാകുന്നത് നവീകരണ പ്രക്രിയയുടെ ഭാഗമാണെന്നും എം വി ഗോവിന്ദന്‍ പറഞ്ഞു
സംസ്ഥാന സമ്മേളനത്തിലെ മറുപടി പ്രസംഗത്തിലാണ് അദ്ദേഹം ഇക്കാര്യം പറഞ്ഞത്.

എഡിഎം ആയിരുന്ന കെ നവീന്‍ബാബുവിന്റെ മരണത്തില്‍ മുന്‍ കണ്ണൂര്‍ ജില്ലാ പഞ്ചായത്ത് പ്രസിഡന്റ് പി പി ദിവ്യ തെറ്റു ചെയ്തു. തെറ്റുചെയ്തത് കൊണ്ടാണ് നടപടി എടുത്തത്. ദിവ്യയുടെ കാര്യത്തില്‍ പാര്‍ട്ടി കൃത്യമായ നിലപാട് എടുത്തിട്ടുണ്ടെന്നും എംവി ഗോവിന്ദന്‍ പറഞ്ഞു. ദിവ്യ ചെയ്തത് തെറ്റു എന്ന് തിരിച്ചറിഞ്ഞാണ് സ്ഥാനത്തുനിന്ന് നീക്കിയത്. ആദ്യം ജില്ലാ പഞ്ചായത്ത് പ്രസിഡന്റ് സ്ഥാനത്ത് നിന്ന് നീക്കി. പിന്നീട് ജില്ലാ കമ്മറ്റി അംഗത്വത്തില്‍ നിന്ന് പ്രാധമിക അംഗത്വത്തിലേക്ക് തരംതാഴ്ത്തി. ഈ രണ്ട് നടപടികളും ദിവ്യ ചെയ്ത തെറ്റ് ബോധ്യപ്പെട്ടതിന്റെ അടിസ്ഥാനത്തിലാണെന്നും എംവി ഗോവിന്ദന്‍ പറഞ്ഞു

കണ്ണൂര്‍ ജില്ലയോട് താന്‍ പക്ഷപാതിത്വം കാണിക്കുന്നുവെന്ന പ്രതിനിധികളുടെ വിമര്‍ശനത്തിനും അദ്ദേഹം മറുപടി പറഞ്ഞു. ജില്ല തിരിച്ചല്ല സിപിഎമ്മില്‍ സ്ഥാനങ്ങളും പദവികളും നിശ്ചയിക്കുന്നതെന്നും സംസ്ഥാന നേതൃത്വം ചര്‍ച്ച ചെയ്താണ് തീരുമാനം എടുക്കുന്നതെന്നും എംവി ഗോവിന്ദന്‍ പറഞ്ഞു.