സ്‌കൂള്‍ വിട്ട് വീട്ടിലേക്കു പോയ പതിമൂന്നുകാരിയെ ലൈംഗിക താത്പര്യത്തോടെ സമീപിച്ചു; യുവാവ് പിടിയില്‍

പത്തനംതിട്ട | സ്‌കൂള്‍ വിട്ട് വീട്ടിലേക്കു പോയ പതിമൂന്നുകാരിയെ ലൈംഗിക താത്പര്യത്തോടെ സമീപിക്കുകയും അത്തരത്തില്‍ സംസാരിച്ച് പിന്തുടര്‍ന്ന് ശല്യം ചെയ്യുകയും ചെയ്തയാളെ റാന്നി പോലീസ് പിടികൂടി. റാന്നി പഴവങ്ങാടി കരികുളം ഉരുളേല്‍ വേങ്ങത്തടം വേങ്ങത്തടത്തില്‍ വീട്ടില്‍ വി എ മനോജ് (39) ആണ് അറസ്റ്റിലായത്.

ഇന്നലെ ഉച്ചയ്ക്ക് രണ്ടോടെ വേങ്ങത്തടത്തു വച്ചാണ് സംഭവം. സ്‌കൂള്‍ വിട്ട് വീട്ടിലേക്ക് നടന്നുപോകുകയായിരുന്ന കുട്ടിയെ ഇയാള്‍ കൈകാട്ടി വിളിച്ച് ആരുടെ മകളാണെന്നും മറ്റും ചോദിച്ചു. ഭയന്ന കുട്ടി വേഗം നടന്നപ്പോള്‍ വീണ്ടും വിളിക്കുകയും അശ്ലീലം കലര്‍ന്ന വാക്പ്രയോഗം നടത്തുകയും ചെയ്തു. ഏതാണ്ട് 300 മീറ്ററോളം കുട്ടിയെ പിന്തുടര്‍ന്ന ഇയാള്‍ അശ്ലീല വാക്കുകള്‍ ആവര്‍ത്തിച്ചു.

മാനസിക സമ്മര്‍ദത്തിലായ പെണ്‍കുട്ടി വീട്ടിലെത്തി വിവരം അറിയിച്ചതിനെ തുടര്‍ന്ന് അമ്മ കുട്ടിയേയും കൂട്ടി രാത്രി 11 ഓടെ റാന്നി പോലീസ് സ്റ്റേഷനിലെത്തി വിവരം പറഞ്ഞു. തുടര്‍ന്ന്, ശിശു സൗഹൃദ ഇടത്തില്‍ വച്ച് കുട്ടിയുടെ മൊഴി വനിതാ പോലീസ് രേഖപ്പെടുത്തി. പിന്നീട് കേസെടുക്കുകയായിരുന്നു.

പ്രതിയെ രാത്രി തന്നെ വീടിനു സമീപത്തു നിന്നും പോലീസ് കസ്റ്റഡിയിലെടുത്തു. വൈദ്യപരിശോധനയ്ക്കു ശേഷം സ്റ്റേഷനിലെത്തിച്ച് വിശദമായി ചോദ്യം ചെയ്തു. കുറ്റം സമ്മതിച്ച ഇയാളുടെ അറസ്റ്റ് ഇന്ന് പുലര്‍ച്ചെ രേഖപ്പെടുത്തുകയായിരുന്നു. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

കുട്ടിക്ക് കൗണ്‍സിലിംഗ് ലഭ്യമാക്കുന്നതിന് റാന്നി പോലീസ് ശിശു ക്ഷേമസമിതിക്ക് റിപോര്‍ട്ട് നല്‍കി. പോലീസ് ഇന്‍സ്പെക്ടര്‍ ജിബു ജോണ്‍, എസ് ഐ. മാനോജ്, സീനിയര്‍ സിവില്‍ പോലീസ് ഓഫീസര്‍ സതീഷ് എന്നിവരടങ്ങിയ സംഘമാണ് പ്രതിയെ പിടികൂടിയത്.