പൊട്ടിവീണ വൈദ്യുത കമ്പിയില്‍ നിന്നും ഷോക്കേറ്റ് 48 കാരന്‍ മരിച്ചു

തിരുവല്ല | തിരുവല്ലയിലെ മേപ്രാലില്‍ പുല്ലു ചെത്താന്‍ പോയ 48 കാരന്‍ പൊട്ടിവീണ വൈദ്യുത കമ്പിയില്‍ നിന്നും വൈദ്യുതാഘാതമേറ്റ് മരിച്ചു. മേപ്രാല്‍ തട്ടുതറയില്‍ വീട്ടില്‍ റെജി ആണ് മരിച്ചത്. ഇന്ന് രാവിലെ 10 മണിയോടെ ആയിരുന്നു സംഭവം.

മേപ്രാല്‍ ന്യൂ ഇന്ത്യ ചര്‍ച്ച് ഓഫ് ഗോഡ് പള്ളിക്ക് സമീപം പൊട്ടി വീണുകിടന്ന വൈദ്യുത കമ്പിയില്‍ നിന്നുമാണ് റെജിക്ക് വൈദ്യുതാഘാതമേറ്റത്. രാവിലെ ആറുമണിക്ക്  പുല്ലു ചെത്താന്‍ പോയ റെജി ഏറെനേരമായും വീട്ടില്‍ മടങ്ങി എത്താതിരുന്നതിനെ തുടര്‍ന്ന് ബന്ധുക്കള്‍ നടത്തിയ അന്വേഷണത്തിലാണ് വെള്ളത്തില്‍ മൃതദേഹം കണ്ടെത്തിയത്.

കെഎസ്ഇബി ഉദ്യോഗസ്ഥര്‍ എത്തി വൈദ്യുത ബന്ധം വിച്ഛേദിച്ച് ശേഷം റെജിയെ തിരുവല്ലയിലെ താലൂക്ക് ആശുപത്രിയില്‍ എത്തിച്ചെങ്കിലും മരണം സംഭവിച്ചു.