അട്ടപ്പാടിയില്‍ യുവാവിനെ അടിച്ചുകൊന്ന കേസ്; പ്രതികള്‍ക്കായി വനത്തില്‍ തിരച്ചിലിന് തണ്ടര്‍ബോള്‍ട്ടും

പാലക്കാട് | അട്ടപ്പാടിയില്‍ യുവാവിനെ അടിച്ചു കൊന്ന കേസില്‍ ഒളിവില്‍ കഴിയുന്ന പ്രതികളെ പിടികൂടാന്‍ തണ്ടര്‍ബോള്‍ട്ടും രംഗത്ത്. പ്രതികള്‍ വനത്തിലേക്ക് രക്ഷപ്പെട്ട സൂചനയുടെ അടിസ്ഥാനത്തിലാണ് തണ്ടര്‍ബോള്‍ട്ടിനേയും തിരിച്ചിലിനായി നിയോഗിച്ചിരിക്കുന്നത്.കേസില്‍ മൂന്നു പ്രതികളെയാണ് ഇനി പിടികൂടാനുള്ളത്. നേരത്തെ 6 പേര്‍ അറസ്റ്റിലായിരുന്നു.

കൊടുങ്ങല്ലൂര്‍ സ്വദേശി നന്ദകിഷോര്‍ (22) ആണ് മര്‍ദ്ദനമേറ്റ് കൊല്ലപ്പെട്ടത്. ഒപ്പമുണ്ടായിരുന്ന സുഹൃത്ത് വിനായകന്‍ ഗുരുതര പരുക്കുകളോടെ തൃശൂര്‍ മെഡിക്കല്‍ കോളജ് ആശുപത്രിയില്‍ ചികിത്സയിലാണ്. തോക്ക് കച്ചവടവുമായി ബന്ധപ്പെട്ട ഇടപാടുകളെ ചൊല്ലിയുള്ള തര്‍ക്കമാണ് കൊലപാതകത്തിലേക്ക് നയിച്ചതെന്ന് പോലീസ് പറയുന്നു.

കണ്ണൂരില്‍ നിന്ന് കിളികളെ കൊല്ലുന്ന തോക്ക് എത്തിച്ചു നല്‍കാമെന്ന് പറഞ്ഞ് നന്ദകിഷോറും കൂട്ടുകാരന്‍ വിനായകനും പ്രതികളില്‍ നിന്ന് ഒരു ലക്ഷം രൂപ വാങ്ങിയിരുന്നു. എന്നാല്‍ നിശ്ചിത സമയം കഴിഞ്ഞും തോക്ക് എത്തിച്ച് കൊടുത്തില്ല. പണം തിരികെ ചോദിച്ചപ്പോള്‍ അതും നല്‍കിയില്ല. ഇതാണ് തര്‍ക്കത്തിലേക്കും കൊലപാതകത്തിലും കലാശിച്ചത്.