മദ്യപിച്ച് പോലീസ് ജീപ്പോടിച്ച് അപകടം വരുത്തി; എ എസ് ഐയെ നാട്ടുകാര്‍ തടഞ്ഞ് പോലീസില്‍ ഏല്‍പ്പിച്ചു

മലപ്പുറം |  വടക്കാങ്ങര കാളാവില്‍ മദ്യപിച്ച് പോലീസ് ജീപ്പ് ഓടിച്ച് അപകടമുണ്ടാക്കിയ പോലീസ് ഉദ്യോഗസ്ഥനെ നാട്ടുകാര്‍ തടഞ്ഞുവച്ചു പോലീസില്‍ ഏല്‍പ്പിച്ചു. മലപ്പുറം സ്റ്റേഷനിലെ എഎസ്‌ഐ ഗോപി മോഹനെയാണ് നാട്ടുകാര്‍ തടഞ്ഞുവച്ചത്. ഒടുവില്‍ മങ്കട പോലീസെത്തി ഉദ്യോഗസ്ഥനെ കസ്റ്റഡിയിലെടുക്കുകയായിരുന്നു. മദ്യപിച്ച് വാഹനമോടിച്ചതിന് പോലീസ് ഇയാൾക്കെതിരെ കേസെടുത്തു.

ഇന്നലെ രാത്രി പത്തോടെയാണ് സംഭവം. പോലീസ് ജീപ്പ് ഒരു കാര്‍ ഇടിച്ചിട്ട് പോകുന്നത് നാട്ടുകാരുടെ ശ്രദ്ധയില്‍പ്പെട്ടു. ജീപ്പ് മറ്റൊരു ബൈക്കിനേയും ഇടിക്കാന്‍ ശ്രമിച്ചിരുന്നു. തുടര്‍ന്ന് ഈ ബൈക്ക് യാത്രികനും മറ്റ് നാട്ടുകാരും ചേര്‍ന്നാണ് ജീപ്പ് വളഞ്ഞ് ഉദ്യോഗസ്ഥനെ പുറത്തിറക്കിയത്.

വണ്ടി തടഞ്ഞപ്പോഴാണ് എ എസ് ഐ മദ്യപിച്ചിട്ടുള്ളതായി നാട്ടുകാര്‍ക്ക് ബോധ്യപ്പെടുന്നത്. ഉടന്‍ തന്നെ ഇവര്‍ പോലീസില്‍ വിവരമറിയിച്ചു. ജില്ലാ പോലീസ് മേധാവിയെ നാട്ടുകാര്‍ വിളിച്ച് വിവരം പറഞ്ഞു. തുടര്‍ന്ന് ജില്ലാ പോലീസ് മേധാവിയുടെ നിര്‍ദേശത്തെ തുടര്‍ന്ന് മങ്കട പോലീസെത്തി മദ്യപിച്ച് വാഹനമോടിച്ച ഉദ്യോഗസ്ഥനെ കസ്റ്റഡിയിലെടുക്കുകയായിരുന്നു.