സ്വർണക്കടത്ത് സംഘം 30കാരനെ തട്ടിക്കൊണ്ടുപോയി ക്രൂരമായി മർദിച്ച് റോഡിൽ ഉപേക്ഷിച്ചു

മലപ്പുറം | മലപ്പുറം കോട്ടക്കലില്‍ 30കാരനെ സ്വര്‍ണക്കടത്ത് സംഘം വീട്ടില്‍നിന്നും തട്ടിക്കൊണ്ടുപോയി മര്‍ദിച്ച് അവശനാക്കി റോഡില്‍ ഉപേക്ഷിച്ചു.കോട്ടക്കല്‍ സ്വദേശി സഹദിനെയാണ് തട്ടിക്കൊണ്ടുപോയത്. വെള്ളിയാഴ്ച രാത്രി എട്ടുമണിയോടെയാണ് സംഭവം.

രണ്ട് കാറുകളില്‍ എത്തിയ സംഘം വീട്ടില്‍നിന്ന് സഹദിനെ പിടിച്ചുകൊണ്ടുപോവുകയായിരുന്നു. സ്വര്‍ണക്കടത്ത് നടത്തുന്ന വിവരം സഹദ് മറ്റാര്‍ക്കോ ഒറ്റിക്കൊടുത്തെന്ന് ആരോപിച്ചായിരുന്നു തട്ടിക്കൊണ്ടുപോകല്‍.  പ്രതികള്‍ മോചനദ്രവ്യമായി ഒരു കോടി രൂപ കുടുംബത്തോട് ആവശ്യപ്പെടുകയും ചെയ്തു.എന്നാല്‍ പ്രതികള്‍ ആവശ്യപ്പെട്ട പണം വീട്ടുകാര്‍ നല്‍കാതായതോടെ സഹദിനെ അക്രമികള്‍ ക്രൂരമായി അക്രമിച്ചശേഷം രണ്ടത്താണിയിലെ റോഡരികില്‍ ഉപേക്ഷിക്കുകയായിരുന്നു.

ഗുരുതരമായി പരുക്കേറ്റ യുവാവിനെ കോട്ടക്കലിലെ സ്വകാര്യ ആശുപത്രിയില്‍ പ്രവേശിപ്പിച്ചു.
കരിപ്പൂരില്‍ ഉള്‍പ്പെടെ സ്വര്‍ണക്കടത്തുമായി ബന്ധമുള്ളവരാണ് സംഭവത്തിന് പിന്നിലെന്നും ആയുധങ്ങള്‍ ഉപയോഗിച്ചാണ് ആക്രമണം നടത്തിയതെന്നും പോലീസ് വ്യക്തമാക്കി.
അക്രമികളില്‍ ചിലരെ  തിരിച്ചറിഞ്ഞിട്ടുണ്ട് .സംഭവത്തില്‍ പോലീസ് അന്വേഷണം ഊര്‍ജിതമാക്കി.