വൈദികന്‍ എന്ന വ്യാജേന വീട്ടില്‍ കയറി വൃദ്ധയുടെ മാല കവര്‍ന്ന സ്ഥിരം കുറ്റവാളി പിടിയില്‍

പത്തനംതിട്ട | വൈദികന്‍ എന്ന വ്യാജേന വീട്ടില്‍ കയറി വൃദ്ധയുടെ മാല മോഷ്ടിച്ച സ്ഥിരം കുറ്റവാളി പിടിയില്‍. അടുത്തയിടെ ജയില്‍ മോചിതനായ തിരുവനന്തപുരം കാഞ്ഞിരംകുളം സ്വദേശി ഷിബു എസ് ആണ് പിടിയിലായത്.

പത്തനംതിട്ട ഏനാദിമംഗലത്ത് കഴിഞ്ഞ ദിവസമായിരുന്നു വൈദികന്‍ എന്ന വ്യാജേന വീട്ടില്‍ കയറി പ്രാര്‍ത്ഥിച്ച ശേഷം പ്രതി മോഷണം നടത്തിയത്. ഏനാദിമംഗലം തോട്ടപ്പാലം സ്വദേശികളായ ബേബി – മറിയാമ്മ ദമ്പതികളാണ് മോഷണത്തിനിരയായത്. വൈദികന്‍ എന്ന് പരിചയപ്പെടുത്തി വീട്ടില്‍ എത്തിയ ഇയാള്‍ സഭയുമായി ബന്ധപ്പെട്ട ഒരു ധനസഹായം കുടുംബത്തിന് അനുവദിച്ചിട്ടുണ്ടെന്നും അത് ലഭ്യമാകാന്‍ ആയിരം രൂപ നല്‍കണമെന്നും അറിയിച്ചു. പണം വാങ്ങിയ ശേഷം വീടിനുള്ളില്‍ കയറി പ്രാര്‍ത്ഥിച്ചു. പിന്നാലെ മറിയാമ്മയുടെ കഴുത്തില്‍ കിടന്ന ഒരു പവന്റെ മാലയും പൊട്ടിച്ചോടുകയായിരുന്നു.

പിടിയിലായ പ്രതി സ്റ്റേഷനില്‍ ഉദ്യോഗസ്ഥരെ ആക്രമിക്കാന്‍ ശ്രമിച്ചു. ലോക്കപ്പിനുള്ളില്‍ നിന്ന് പോലീസുകാരുടെ നേര്‍ക്ക് വിസര്‍ജ്യം എറിഞ്ഞായിരുന്നു പരാക്രമം. സ്ഥിരം കുറ്റവാളിയായ ഇയാള്‍ 30ന് ജയില്‍ മോചിതനായതിന് തൊട്ടുപിന്നാലെയാണ് വീണ്ടും മോഷണം നടത്തിയതെന്ന് പോലീസ് പറയുന്നു.