കണ്ണൂരില്‍ ഓടിക്കൊണ്ടിരുന്ന ലോറിക്ക് തീപ്പിടിച്ചു

കണ്ണൂര്‍  | ചാല ബൈപ്പാസില്‍ ഓടിക്കൊണ്ടിരിക്കുന്ന ലോറിക്ക് തീ പിടിച്ചു. ചൊവ്വാഴ്ച ഉച്ചക്ക് മൂന്നുമണിയോടെയാണ് സംഭവം.എറണാകുളത്ത് നിന്നും പ്ലൈവുഡ് കയറ്റി പൂനെയിലേക്ക് പോവുകയായിരുന്ന മഹാരാഷ്ട്ര രജിസ്ട്രേഷനുള്ള ലോറിക്കാണ് തീപിടിച്ചത്. സംഭവത്തില്‍ ലോറിയുടെ കാബിന്‍ കത്തി നശിച്ചു. കണ്ണൂരില്‍ നിന്നും അഗ്നിരക്ഷാ സേനയെത്തിയാണ് തീ അണച്ചത്.

ഡ്രൈവര്‍ ഉള്‍പ്പെടെ രണ്ടു പേരാണ് വാഹനത്തില്‍ ഉണ്ടായിരുന്നത്. എഞ്ചിനില്‍ നിന്നും തീ ഉയരുന്നതു കണ്ട് വാഹനം ഒരു വശത്തേക്കൊതുക്കി ഇരുവരും ഇറങ്ങി ഓടുകയായിരുന്നു. വാഹനത്തിന്റെ കാബിന്‍ പൂര്‍ണ്ണമായും കത്തി നശിച്ചു. കൂടാതെ, പ്ലൈവുഡ് ലോഡിന്റെ ഒരു ഭാഗവും കത്തി നശിച്ചിട്ടുണ്ട്. ഷോര്‍ട്ട് സര്‍ക്യൂട്ടാണ് തീപ്പിടുത്തത്തിന് കാരണമെന്നാണ് പ്രാഥമിക നിഗമനം.