പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ച് കൊലപ്പെടുത്തി; 59 കാരന് വധശിക്ഷ

ലക്‌നോ| ഉത്തര്‍പ്രദേശില്‍ പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ച് കൊലപ്പെടുത്തിയ 59 കാരന് വധശിക്ഷ വിധിച്ച് കോടതി. കേദാര്‍നാഥ് റാത്തൂര്‍ എന്ന റിക്ഷക്കാരനാണ് കോടതി വധശിക്ഷ വിധിച്ചത്. 2016ലാണ് കേസിനസ്പദമായ സംഭവമുണ്ടായത്. വധശിക്ഷ സ്ഥിരീകരിക്കുന്നതിനായി കോടതി അലഹബാദ് ഹൈക്കോടതിയെ സമീപിച്ചിട്ടുണ്ട്.

പ്രതി നടത്തിയ ബലാത്സംഗത്തിന്റെയും കൊലപാതകത്തിന്റെയും രീതി ഒരു ശിക്ഷാ ഇളവിനും അര്‍ഹനാക്കുന്നില്ലെന്നും കോടതി പറഞ്ഞു. പെണ്‍കുട്ടി കരഞ്ഞപ്പോള്‍ പ്രതി കുട്ടിയുടെ വായില്‍ തുണി തിരുകിയതിനെ തുടര്‍ന്ന് ശ്വാസം മുട്ടിയാണ് മരണം സംഭവിച്ചത്. 2016 മാര്‍ച്ച് 17 നാണ് കേസ് രജിസ്റ്റര്‍ ചെയ്തത്. അടുത്ത ദിവസം പെണ്‍കുട്ടിയുടെ മൃതദേഹം കണ്ടെത്തി. തുടര്‍ന്നുള്ള അന്വേഷണത്തില്‍ കുട്ടിയെ അവസാനമായി കണ്ടത് പ്രതിക്കൊപ്പമാണെന്ന് കണ്ടെത്തുകയായിരുന്നു. പ്രതി പിന്നീട് കുറ്റസമ്മതം നടത്തി.