കലോത്സവം കഴിഞ്ഞ് ട്രയിനില്‍ മടങ്ങവേ വിദ്യാര്‍ഥിക്ക്  അപകടം

കൊല്ലം | സംസ്ഥാന സ്‌കൂള്‍ കലോത്സവം കഴിഞ്ഞ് മടങ്ങിയ വിദ്യാര്‍ഥിക്ക് ട്രയിനില്‍ വച്ചുണ്ടായ അപകടത്തില്‍ ഇടതുകാലിന്റെ പെരുവിരല്‍ നഷ്ടമായി. വട്ടപ്പാട്ട് മത്സരത്തില്‍ പങ്കെടുത്ത് എ ഗ്രേഡ് കരസ്ഥമാക്കിയ സംഘത്തിലെ മണവാളനായ മുഹമ്മദ് ഫൈസലിനാണ് പരിക്കേറ്റത്.

ശനിയാഴ്ച രാത്രി വൈകി അവസാനിച്ച മത്സരത്തിനു ശേഷം ചെന്നൈ-ഗുരുവായൂര്‍ എക്‌സ്പ്രസിലാണ് ഫൈസലും കൂട്ടുകാരും നാട്ടിലേക്ക് മടങ്ങിയത്.സീറ്റ് കിട്ടാത്തതിനെ തുടര്‍ന്ന് ഫൈസലും കൂട്ടുകാരും വാതിലിനടുത്തായിരുന്നു നിന്നത്. കാല്‍ പ്ലാറ്റ്‌ഫോമിനും ട്രെയിനിനുമിടയില്‍ കുടുങ്ങിയതാകാമെന്ന് അധ്യാപകന്‍ വി.പി.അബൂബക്കര്‍ പറഞ്ഞു. കായംകുളം ജനറല്‍ ആശുപത്രിയില്‍ പ്രഥമചികിത്സയ്ക്കുശേഷം ഫൈസലിനെ കൊച്ചി സ്‌പെഷലിസ്റ്റ്‌സ് ആശുപത്രിയിലെത്തിച്ചു. ഇടതു കാലിലെ പെരുവിരല്‍ ശാസ്ത്രക്രിയയില്‍ മുറിച്ചുമാറ്റി.

പെരുമ്പാവൂര്‍ തണ്ടേക്കാട് ജമാഅത്ത് സ്‌കൂളിലെ പത്താംക്ലാസ് വിദ്യാര്‍ഥിയാണ് ഫൈസല്‍.