Kerala
റോഡ് മുറിച്ചുകടക്കുന്നതിനിടെ വിദ്യാര്ഥിനിയെ സ്വകാര്യബസ് ഇടിച്ചുതെറിപ്പിച്ചു; ഡ്രൈവര്ക്കെതിരെ കേസെടുത്ത് പോലീസ്
ഡ്രൈവറുടെ ലൈസന്സ് സസ്പെന്ഡ് ചെയ്യാനും ബസിന്റെ പെര്മിറ്റ് റദ്ദാക്കാനും മോട്ടോര് വാഹനവകുപ്പ് നടപടി ആരംഭിച്ചു.
കോഴിക്കോട്| കോഴിക്കോട് ചെറുവണ്ണൂരില് സീബ്രാലൈനിലൂടെ റോഡ് മുറിച്ചു കടന്ന വിദ്യാര്ഥിനിയെ സ്വകാര്യ ബസ് ഇടിച്ചു തെറിപ്പിച്ച സംഭവത്തില് ഡ്രൈവര്ക്കെതിരെ കേസെടുത്ത് പോലീസ്. അശ്രദ്ധമായി വാഹനമോടിച്ചതിന് ബസ് ഡ്രൈവര്ക്കെതിരെ നല്ലളം പോലീസ് ആണ് കേസെടുത്തത്. ഡ്രൈവറുടെ ലൈസന്സ് സസ്പെന്ഡ് ചെയ്യാനും ബസിന്റെ പെര്മിറ്റ് റദ്ദാക്കാനും മോട്ടോര് വാഹനവകുപ്പ് നടപടി ആരംഭിച്ചതായാണ് വിവരം.
വെള്ളിയാഴ്ച ചെറുവണ്ണൂര് സ്കൂളിന് സമീപമാണ് സംഭവമുണ്ടായത്. സീബ്രാലൈന് മുറിച്ചു കടക്കുന്നതിനിടെ വിദ്യാര്ഥിനി ഫാത്തിമയെയാണ് സ്വകാര്യബസ് ഇടിച്ചുതെറിപ്പിച്ചത്. ഇടിയുടെ ആഘാതത്തില് ബസിന്റെ അടിയില് കുടുങ്ങിയ ഫാത്തിമ അത്ഭുതകരമായി രക്ഷപ്പെടുകയായിരുന്നു. മഞ്ചേരി ഭാഗത്തേയ്ക്ക് സര്വീസ് നടത്തിയ ബസ് ആണ് മരണപ്പാച്ചില് നടത്തിയത്.
ഇരുവശവും നോക്കി റോഡ് മുറിച്ചു കടക്കുന്നതിനിടെ റോഡിന്റെ മധ്യഭാഗത്ത് വച്ചാണ് ബസ് ഫാത്തിമയെ ഇടിച്ചുതെറിപ്പിച്ചത്. അപകടത്തെ തുടര്ന്ന് ബസിന്റെ അടിയില് നിന്ന് എഴുന്നേറ്റ് വന്ന ഫാത്തിമയെ ഉടന് ആശുപത്രിയില് പ്രവേശിപ്പിച്ചു. പരിശോധനയില് കാര്യമായ പരിക്കില്ല എന്ന് കണ്ടെത്തി. സംഭവത്തിന്റെ സിസിടിവി ദൃശ്യങ്ങള് പുറത്തുവന്നതിന് പിന്നാലെയാണ് പോലീസും മോട്ടോര് വാഹനവകുപ്പും നടപടി സ്വീകരിച്ചത്.