കേണിച്ചിറയില്‍ ഭീതിപരത്തിയ കടുവ കൂട്ടിലായി

കല്‍പ്പറ്റ |  വയനാട്ടിലെ കേണിച്ചിറയില്‍ ഭീതിപരത്തിയ കടുവ വനംവകുപ്പ് ഒരുക്കിയ കൂട്ടില്‍ കുരുങ്ങി. ഇന്ന് രാത്രി 11ഓടെയാണ് കടുവ കൂട്ടിലായത്. മാളിയേക്കല്‍ ബെന്നിയുടെ വീടിന് സമീപം സ്ഥാപിച്ച രണ്ടാമത്തെ കൂട്ടിലാണ് കടുവ കയറിയത്.  മയക്ക് വെടിവെച്ച് പിടികൂടാനുള്ള ഒരുക്കത്തിനിടെയാണ് കടുവ കുടുങ്ങിയത്. കൂട്ടിലായ കടുവയെ പുനരധിവാസ കേന്ദ്രത്തിലെത്തിച്ച് വൈദ്യപരിശോധനക്ക് വിധേയമാക്കുമെന്നാണ് ്അറിയുന്നത്.

ഇന്ന് രാത്രി ഒമ്പതോടെ മാളിയേക്കല്‍ ബെന്നിയുടെ തൊഴുത്തില്‍ വീണ്ടും കടുവ എത്തിയിരുന്നു. ഇന്നലെ ബെന്നിയുടെ തൊഴുത്തില്‍ കയറിയ കടുവ രണ്ട് പശുക്കളെ കൊന്നിരുന്നു. ഇവിടെയാണ് ഇന്ന് രാത്രി ഒമ്പതോടെ വീണ്ടും കടുവ എത്തിയത്. ഇതിന്റെ സിസിടിവി ദൃശ്യങ്ങള്‍ പുറത്തുവന്നിട്ടുണ്ട്. കിഴക്കേല്‍ സാബുവിന്റെ പശുവിനെ കഴിഞ്ഞ ദിവസം രാത്രി കടുവ കൊന്നിരുന്നു.

അതേ സമയം കടുവാ ഭീതി നിലനില്‍ക്കുന്ന പ്രദേശങ്ങളില്‍ നിരോധനാജ്ഞ പ്രഖ്യാപിച്ചിരുന്നു, പൂതാടി പഞ്ചായത്തിലെ 3 വാര്‍ഡുകളില്‍ രണ്ട് ദിവസത്തേക്ക് നിരോധനാജ്ഞ പ്രഖ്യാപിച്ചത്. കടുവയെ മയക്കുവെടി വെക്കുന്നതിന്റെ ഭാഗമായി പഞ്ചായത്തിലെ 2, 16, 19 വാര്‍ഡുകളിലാണ് നിരോധനാജ്ഞ പ്രഖ്യാപിച്ചിരുന്നത്. കടുവ കൂട്ടിലായ സാഹചര്യത്തില്‍ നിരോധനാജ്ഞ പിന്‍വലിക്കും