അബ്കാരി കേസ്; വാറ്റുചാരായം എത്തിച്ചു നല്‍കിയിരുന്നയാളും അറസ്റ്റില്‍

പത്തനംതിട്ട | മൂഴിയാര്‍ പോലീസ് രജിസ്റ്റര്‍ ചെയ്ത അബ്കാരി കേസിലെ പ്രതികള്‍ക്ക് വാറ്റുചാരായം എത്തിച്ചു നല്‍കിയയാളെ പിടികൂടി. സീതത്തോട് ആങ്ങമൂഴി, കൊച്ചാണ്ടി വെള്ളാപ്പള്ളില്‍ വീട്ടില്‍ നവാസ് (55) ആണ് അറസ്റ്റിലായത്. ഒന്നും രണ്ടും പ്രതികളായ സുജിത് മോന്‍ (40), അനീഷ് (41) എന്നിവരെ ചോദ്യം ചെയ്തപ്പോള്‍ ലഭിച്ച വിവരത്തിന്റെ അടിസ്ഥാനത്തിലാണ് പ്രതിയെ അറസ്റ്റ് ചെയ്തത്.

കൊച്ചാണ്ടി ഇടുപ്പ് കല്ല് പബ്ലിക് റോഡില്‍ ഇടുപ്പുകല്ല് വടക്കേക്കര എന്ന സ്ഥലത്ത് വാറ്റുചാരായം വില്‍പന നടത്തിയതിനാണ് ഡിസംബര്‍ 21ന് മൂഴിയാര്‍ പോലീസ് ഇന്‍സ്പെക്ടറായിരുന്ന എസ് ഉദയകുമാറിന്റെ നേതൃത്വത്തിലുള്ള പോലീസ് സംഘം ഇടുപ്പുകല്ല് പുത്തന്‍പുരയില്‍ സുജിത്ത് മോനെ കസ്റ്റഡിയിലെടുത്തത്. സുജിത്തിന് ഒപ്പം സ്ഥലത്തുണ്ടായിരുന്ന ഇടുപ്പുകല്ല് പറമ്പത്ത് വീട്ടില്‍ അനീഷ് പോലീസിനെ കണ്ട് ഓടിരക്ഷപ്പെട്ടിരുന്നു. കേസിലെ രണ്ടാം പ്രതിയായ ഇയാളെ കഴിഞ്ഞ മാസം ഒന്നിന് പോലീസ് അറസ്റ്റ് ചെയ്തു.

പ്രതികളുടെ കുറ്റസമ്മതമൊഴി പ്രകാരമാണ്, വാറ്റുചാരായം എത്തിച്ചു നല്‍കിയത് നവാസ് ആണെന്ന് തിരിച്ചറിഞ്ഞതും തുടര്‍ന്നുള്ള അന്വേഷണത്തില്‍ ഇയാളെ ആങ്ങാമൂഴിയില്‍ കണ്ടെത്തി പിടികൂടിയതും. പ്രതിയെ കോടതിയില്‍ ഹാജരാക്കി. പോലീസ് സംഘത്തില്‍ എസ് ഐ. അനില്‍കുമാര്‍, എസ് സി പി ഒ. സുധീഷ്, സി പി ഒ. സച്ചിന്‍ എന്നിവരാണ് ഉണ്ടായിരുന്നത്.