Kerala
ഭാര്യാപിതാവിനേയും സഹോദരനേയും കൊലപ്പെടുത്തിയ പ്രതിക്ക് ജീവപര്യന്തവും പിഴയും
പ്രധാന സാക്ഷികളായ അപര്ണയും മാതാവ് ഷീനയും അയല്വാസിയായ വിനോദും പ്രതിക്കെതിരെ മൊഴി നല്കി
![](https://assets.sirajlive.com/2024/06/murder-case.jpg)
തിരുവനന്തപുരം | ഭാര്യാപിതാവിനെയും സഹോദരനെയും കൊലപ്പെടുത്തിയ കേസില് മരുമകന് ജീവപര്യന്തം തടവും പിഴയും വിധിച്ച് കോടതി. പൂജപ്പുര മുടവന്മുഗള് അനിതാഭവനില് സുനില്കുമാര്, മകന് എസ് അഖില് എന്നിവരെ കുത്തിക്കൊലപ്പെടുത്തിയ കേസില് സുനില്കുമാറിന്റെ മരുമകനായ മുട്ടത്തറ പുതുവല്പുത്തന്വീട്ടില് അരുണിനെയാണ് തിരുവനന്തപുരം അഡീഷനല് സെഷന്സ് ജഡ്ജ് കെ വിഷ്ണു ശിക്ഷിച്ചത്.
കൊലക്കുറ്റത്തിന് ജീവപര്യന്തം തടവും അഞ്ചുലക്ഷം രൂപ പിഴയും വീട്ടില് അതിക്രമിച്ചുകയറിയതിന് അഞ്ചുവര്ഷം കഠിനതടവും 50,000 രൂപ പിഴയുമാണ് ശിക്ഷ.
2021 ഒക്ടോബറിലാണ് സംഭവം. പ്രതിയുടെ പീഡനം സഹിക്കാനാവാതെ രണ്ട് വയസ്സുള്ള മകളുമായി ഭാര്യ അപര്ണ പിതാവായ സുനില്കുമാറിന്റെ പൂജപ്പുരയിലെ വീട്ടിലെത്തി. ഇതില് പ്രകോപിതനായ അരുണ് രാത്രി പൂജപ്പുരയിലുള്ള വീട്ടിലെത്തി സുനില്കുമാറിനെയും അഖിലിനെയും കുത്തിപ്പരിക്കേല്പ്പിക്കുകയായിരുന്നു. ഇരുവരെയും തിരുവനന്തപുരം മെഡിക്കല് കോളജ് ആശുപത്രിയില് എത്തിച്ചെങ്കിലും രക്ഷിക്കാനായില്ല.
പ്രധാന സാക്ഷികളായ അപര്ണയും മാതാവ് ഷീനയും അയല്വാസിയായ വിനോദും പ്രതിക്കെതിരെ മൊഴി നല്കി. പിഴത്തുക മരണപ്പെട്ട സുനില്കുമാറിന്റെ ഭാര്യക്ക് നല്കാന് കോടതി ഉത്തരവായി. ഇരകളായ സുനില്കുമാറിന്റെ ഭാര്യ ഷീന, മകള് അപര്ണ, ഇവരുടെ മകള് അനാമിക എന്നിവര്ക്ക് സര്ക്കാറിന്റെ വിക്ടിം കോമ്പന്സേഷന് സ്കീമില് ഉള്പ്പെടുത്തി നഷ്ടപരിഹാരം നല്കാനും കോടതി ഉത്തരവായി. പ്രോസിക്യൂഷനുവേണ്ടി സ്പെഷല് പ്രോസിക്യൂട്ടര് വട്ടപ്പാറ വി സാജന്പ്രസാദ്, അഡ്വ. പ്രീത, അഡ്വ. പി ബിജുലാല് എന്നിവര് ഹാജരായി.