Kerala
പിപി ദിവ്യയുടെ മുന്കൂര് ജാമ്യാപേക്ഷ പരിഗണിക്കുന്നത് മാറ്റിവെച്ചു
തലശ്ശേരി പ്രിന്സിപ്പല് സെഷന്സ് കോടതിയാണ് ദിവ്യയുടെ മുന്കൂര് ജാമ്യാപേക്ഷ പരിഗണിക്കുന്നത്
കൊച്ചി | എ ഡി എം നവീന് ബാബുവിന്റെ മരണവുമായി ബന്ധപ്പെട്ട കേസില് മുന് ജില്ലാ പഞ്ചായത്ത് പ്രസിഡന്റും സിപിഎം നേതാവുമായ പി പി ദിവ്യ നല്കിയ മുന്കൂര് പരിഗണിക്കുന്നത് കോടതി ഈ മാസം 24ലേക്ക് മാറ്റി. തലശ്ശേരി പ്രിന്സിപ്പല് സെഷന്സ് കോടതിയാണ് ദിവ്യയുടെ മുന്കൂര് ജാമ്യാപേക്ഷ പരിഗണിക്കുന്നത് . മുൻകൂര് ജാമ്യാപേക്ഷയിൽ ഇന്ന് വാദം കേള്ക്കാനിരിക്കെയാണ് കോടതി മാറ്റിവെച്ചത്. കേസ് വ്യാഴാഴ്ച പരിഗണിക്കുമ്പോള് പോലീസ് റെക്കോര്ഡുകളും ഹാജരാക്കണമെന്ന് കോടതി നിര്ദേശിച്ചു.കോടതി മുന്കൂര് ജാമ്യം അനുവദിച്ചില്ലെങ്കില് അറസ്റ്റ് അടക്കമുള്ള നടപടികളിലേക്ക് പോലീസ് കടന്നേക്കും.
അഴിമതിക്കെതിരെ സദുദ്ദേശപരമായി മാത്രമാണ് താന് സംസാരിച്ചത്. ഫയല് നീക്കം വേഗത്തിലാക്കണമെന്നതാണ് താന് ഉദ്ദേശിച്ചതെന്നും ഹരജിയില് പറയുന്നു. പ്രസംഗത്തിന്റെ വീഡിയോ അടക്കം സമര്പ്പിച്ചുകൊണ്ടാണ് മുന്കൂര് ജാമ്യഹരജി സമര്പ്പിച്ചിരിക്കുന്നത്. ജില്ലാ കലക്ടറാണ് തന്നെ പരിപാടിയിലേക്ക് ക്ഷണിച്ചതെന്നും ദിവ്യ ഹര്ജിയില് ചൂണ്ടികാട്ടിയിട്ടുണ്ട്.