നരബലിക്ക് ശേഷം സ്ത്രീകളുടെ മാംസം പാകം ചെയ്ത് ഭക്ഷിച്ചു; ആയുസ്സ് കൂടാനെന്ന് പ്രതികളുടെ മൊഴി

പ​ത്ത​നം​തി​ട്ട | ഇ​ല​ന്തൂ​രി​ല്‍ മനുഷ്യമനസാക്ഷിയെ ഞെട്ടിച്ച ഇ​ര​ട്ട​ന​ര​ബ​ലിയിൽ സ്ത്രീ​ക​ളെ കൊലപ്പെടുത്തിയ ശേഷം മാസം പാകം ചെയ്ത് ഭക്ഷിച്ചതായി പ്രതിയുടെ മൊഴി. കേസിൽ അറസ്റ്റിലായ പ്രതികളിൽ ഒരാളായ ലൈലയാണ് പോലീസിനോട് ഇക്കാര്യം വെളിപ്പെടുത്തിയത്. നരബലിയുടെ ആസൂത്രകൻ ഷാഫിയുടെ നിർദേശപ്രകാരമാണ് ഇങ്ങനെ ചെയ്തതെന്നും ലൈല മൊഴി നൽകി. ആയുരാരോഗ്യത്തിന് വേണ്ടി മൃതദേഹങ്ങളില്‍നിന്ന് മാംസം ഭക്ഷിക്കാന്‍ ഷാഫി നിർദേശിച്ചതായും പ്രതി പറഞ്ഞു.

പത്മയെയും റോസ്‍ലിയേയും കൊലപ്പെടുത്തിയ ശേഷം മാംസഭാഗം അറുത്തെടുത്ത് സൂക്ഷിച്ചിരുന്നു. മൃതദേഹത്തിന്റെ മറ്റു ഭാഗങ്ങൾ കുഴിച്ചിട്ട ശേഷമാണ് മാറ്റിവെച്ച മാംസം പാകം ചെയ്ത് കഴിച്ചത്. മാംസം പൂജ ചെയ്ത ശേഷമാണ് ഷാഫി ഭഗവൽസിംഗിനും ലൈലക്കും നൽകിയത്.

അ​തേ​സ​മ​യം പോലീസ് പ്രതിയുടെ മൊഴി പൂർണമായും വിശ്വാസത്തിലെടുത്തിട്ടില്ല. ഇ​ക്കാ​ര്യ​ത്തി​ല്‍ വ്യ​ക്ത​ത വ​രു​ത്താ​ന്‍ കൂ​ടു​ത​ല്‍ അ​ന്വേ​ഷ​ണം വേ​ണ​മെ​ന്ന് പോ​ലീ​സ് അ​റി​യി​ച്ചു. ന​ര​ബ​ലി​ക്കു മു​മ്പ് സ്ത്രീ​ക​ളു​ടെ ആ​ഭ​ര​ണ​ങ്ങ​ള്‍ ഷാ​ഫി കൈ​ക്ക​ലാ​ക്കി. ഇ​ത് പി​ന്നീ​ട് എ​റ​ണാ​കു​ളം, പ​ത്ത​നം​തി​ട്ട ജി​ല്ല​ക​ളി​ലെ ബാ​ങ്കു​ക​ളി​ല്‍ പ​ണ​യം വ​ച്ചെ​ന്നും പോ​ലീ​സ് പ​റ​ഞ്ഞു.

ഇന്നലെയാണ് കേരളത്തെ ഞെട്ടിച്ച നരബലി കേസ് വിവരങ്ങൾ പുറത്തായത്. ക​ട​വ​ന്ത്ര​യി​ല്‍ താ​മ​സി​ക്കു​ന്ന ത​മി​ഴ്​നാ​ട് സ്വ​ദേ​ശിനി പ​ത്മം, തൃ​ശൂ​ര്‍ സ്വ​ദേ​ശിനി റോ​സി​ലി എ​ന്നി​വ​രാ​ണ് നരബലിക്ക് ഇരയായി കൊ​ല്ല​പ്പെ​ട്ട​ത്. റോ​സി​ലി​യെ ജൂ​ണ്‍ എ​ട്ടി​നും പ​ത്മ​ത്തെ സെ​പ്റ്റം​ബ​ര്‍ 26 നും ​കൊ​ല​പ്പെ​ടു​ത്തി​യെ​ന്നാ​ണ് കരുതുന്നത്.