Editors Pick
കാത്തിരിപ്പിനൊടുവിൽ കൈലാഖ് എത്തി; വില 7.89 ലക്ഷം മുതൽ; സവിശേഷതകൾ അറിയാം...
കുഷാഖിനോട് സാമ്യതയുള്ള ഇൻ്റീരിയറും ഫീച്ചറുകളുമാണ് കൈലാഖിന്. ഡാഷ്‌ബോര്‍ഡ് ലേ ഔട്ടും സൈഡ് വെറ്റുകള്‍, ക്ലൈമറ്റ് കണ്‍ട്രോള്‍ പാനലുകള്‍, ടു സ്‌പോക് സ്റ്റിയറിങ്, 8 ഇഞ്ച് ഡിജിറ്റല്‍ ഇന്‍സ്ട്രുമെന്റ് ക്ലസ്റ്റര്‍, 10 ഇഞ്ച് ടച്ച് സ്‌ക്രീന്‍ എന്നീ ഫീച്ചറുകളും ഇരു മോഡലുകളും പങ്കിട്ടെടുക്കുന്നു.
പുറത്തിറങ്ങുംമുമ്പേ വാർത്തകളിൽ ഇടംപിടിച്ച വാഹനമാണ് സ്‌കോഡയുടെ കൈലാഖ് (Kylaq). വാഹനത്തിന്‌ ജനങ്ങൾക്കിടയിൽനിന്നുതന്നെ പേര് അന്വേഷിച്ചാണ്‌ സ്‌കോഡ പുതിയ മോഡലിന്‌ ഗംഭീര ഇൻഡ്രോ നൽകിയത്‌. കൈലാഖ് എന്ന പേര് നിർദേശിച്ചതാകട്ടെ ഒരു മലയാളിയും. അന്നുമുതൽ വാഹനപ്രേമികൾ വാഹനത്തിനായി കാത്തിരിക്കുകയായിരുന്നു. ഒടുവിൽ എല്ലാവരെയും അതിശയിപ്പിച്ചാണ്‌ കോംപാക്‌ട്‌ എസ്‌യുവിയായ കൈലാഖ് എത്തിയിരിക്കുന്നത്‌.
7.89 ലക്ഷം രൂപക്ക് വിപണിയിലെത്തുന്നു എന്നതാണ്‌ കൈലാഖിൻ്റെ ആദ്യ പ്രത്യേകത. വിലയിൽ മാത്രമല്ല ഡിസൈനിലും വലിയ പ്രതീക്ഷയോടെയാണ്‌ കൈലാഖിനെ ചെക് വാഹന നിര്‍മാതാക്കളായ സ്‌കോഡ അവതരിപ്പിച്ചിരിക്കുന്നത്‌. ഇതുവരെ പുറത്തിറക്കിയതില്‍ വെച്ച് ഏറ്റവും ചെറിയ എസ്‌യുവിയായ കൈലാഖ് ഇന്ത്യയില്‍ ഒരു ലക്ഷത്തിലേറെ വില്‍പനയെന്ന നേട്ടത്തിലേക്ക് സ്‌കോഡയെ നയിക്കുമെന്നാണ് കമ്പനിയുടെ കണക്കുകൂട്ടല്‍. 2022ല്‍ ഇന്ത്യ 2.0 പ്രോഗ്രാമിൻ്റെ ഭാഗമായി സ്‌കോഡയുടെ കുഷാഖ്, സ്ലാവിയ മോഡലുകള്‍ വില്‍പന 53,721ലെത്തിച്ചിരുന്നു.
ആകെ രണ്ടു ലക്ഷത്തോളം അപേക്ഷകളില്‍ നിന്നാണ് കൈലാഖ് എന്ന പേര് സ്‌കോഡ തെരഞ്ഞെടുത്തത്. കെ എന്ന അക്ഷരത്തില്‍ തുടങ്ങുകയും ക്യു എന്ന അക്ഷരത്തില്‍ അവസാനിക്കുകയും ചെയ്യുന്നതായിരിക്കണം പേര് എന്നതായിരുന്നു സ്‌കോഡയുടെ നിബന്ധന. സംസ്‌കൃതത്തില്‍ സ്ഫടികം എന്നാണ് കൈലാഖ് എന്ന വാക്കിന് അര്‍ഥം. കുഷാഖ് കറോഖ്, കോഡിയാഖ് എന്നീ മോഡലുകളുള്ള സ്‌കോഡയില്‍ നിന്നു തന്നെയാണ് കൈലാഖിൻ്റെയും വരവെന്ന് എളുപ്പത്തില്‍ ഈ പേരിലെ സവിശേഷതകള്‍ കൊണ്ട് ഊഹിച്ചെടുക്കാനുമാവും.
ഒതുക്കമുള്ള വാഹനം
സ്‌കോഡയുടെ മോഡേണ്‍ സോളിഡ് ഡിസൈന്‍ സവിശേഷതകളുള്ള വാഹനമാണ് കൈലാഖ്. സ്പ്ലിറ്റ് ഹെഡ്‌ലാംപുകളും എല്‍ഇഡി ഡിആര്‍എല്ലുകളും എല്‍ഇഡി പ്രൊജക്ടര്‍ ഹെഡ്‌ലാംപുകളും കൈലാഖിലുണ്ട്. കുഷാഖിനെ അപേക്ഷിച്ച് മെലിഞ്ഞ ഗ്രില്ലുകള്‍. ബംപറില്‍ കറുപ്പ് ക്ലാഡിങുകളും അലൂമിനിയം ലുക്ക് സ്‌പോയ്‌ലറും നല്‍കിയിട്ടുണ്ട്. വീല്‍ബേസിൻ്റെ കാര്യത്തില്‍ കൈലാഖ് (2,566എംഎം) കുഷാഖിനെ അപേക്ഷിച്ച് 85 എംഎം പിന്നിലാണ്. കുഷാഖിനേക്കാള്‍ 230 എംഎം നീളവും കൈലാഖിന് കുറവാണ്. ഗ്രൗണ്ട് ക്ലിയറന്‍സ് 189 എംഎം.
കുഷാഖിൻ്റെ പിൻഗാമി
കുഷാഖിനോട് സാമ്യതയുള്ള ഇൻ്റീരിയറും ഫീച്ചറുകളുമാണ് കൈലാഖിന്. ഡാഷ്‌ബോര്‍ഡ് ലേ ഔട്ടും സൈഡ് വെറ്റുകള്‍, ക്ലൈമറ്റ് കണ്‍ട്രോള്‍ പാനലുകള്‍, ടു സ്‌പോക് സ്റ്റിയറിങ്, 8 ഇഞ്ച് ഡിജിറ്റല്‍ ഇന്‍സ്ട്രുമെന്റ് ക്ലസ്റ്റര്‍, 10 ഇഞ്ച് ടച്ച് സ്‌ക്രീന്‍ എന്നീ ഫീച്ചറുകളും ഇരു മോഡലുകളും പങ്കിട്ടെടുക്കുന്നു. സിംഗിള്‍ പേന്‍ സണ്‍ റൂഫ്, കീലെസ് എന്‍ട്രി, വയര്‍ലെസ് ഫോണ്‍ ചാര്‍ജര്‍, വയര്‍ലസ് ആന്‍ഡ്രോയിഡ് ഓട്ടോ/ ആപ്പിള്‍ കാര്‍ പ്ലേ, ഫ്രണ്ട് സീറ്റ് വെൻ്റിലേഷന്‍ ലെതറൈറ്റ് അപ്പോള്‍സ്ട്രി എന്നിങ്ങനെയുള്ള സെഗ്മെൻ്റിലെ പ്രധാന ഫീച്ചറുകളും കൈലാഖിലുണ്ട്.
ഡ്രൈവര്‍ സീറ്റും മുന്‍ സീറ്റും പവേഡാണെന്നതില്‍ കൈലാഖ് എതിരാളികളെ മറികടക്കുന്നുമുണ്ട്. എല്ലാ ഡോറുകളിലും ബോട്ടില്‍ ഹോള്‍ഡറുകളും തണുപ്പിക്കാവുന്ന ഗ്ലൗ ബോക്‌സും കപ് ഹോള്‍ഡറുകളും കാബിനുള്ളിലെ സൗകര്യങ്ങള്‍ വര്‍ധിപ്പിക്കുന്നു.
കാലുകള്‍ വെക്കാന്‍ പിന്‍സീറ്റുകളില്‍ താരതമ്യേന വിശാലമായ സൗകര്യമുണ്ട്. ഫോള്‍ഡ് ഡൗണ്‍ സെൻ്റര്‍ ആംറസ്റ്റ്, അഡ്ജസ്റ്റബിള്‍ ഹെഡ്‌റെസ്റ്റ്, 3 പോയിൻ്റ്‌ സീറ്റ് ബെല്‍റ്റ് എന്നിവയും കൈലാഖിലുണ്ട്. 446 ലീറ്ററാണ് കൈലാഖിൻ്റെ ബൂട്ട്‌സ്‌പേസ്.
ത്രീ സിലിണ്ടര്‍ 1.0 ടിഎസ്‌ഐ എന്‍ജിനാണ് കൈലാഖില്‍. 999 സിസി എന്‍ജിന്‍ 115 എച്ച്പി കരുത്തും 178എന്‍എം പരമാവധി ടോര്‍ക്കും പുറത്തെടുക്കും. 6 സ്പീഡ് മാനുവല്‍/6 സ്പീഡ് ടോര്‍ക്ക് കണ്‍വെര്‍ട്ടര്‍ ഓട്ടമാറ്റിക് ഗിയര്‍ബോക്‌സ് ഓപ്ഷനുകള്‍. പൂജ്യത്തില്‍ നിന്നും മണിക്കൂറില്‍ 100 കീലോമീറ്റര്‍ വേഗതയിലേക്ക് 10.5 സെക്കന്‍ഡില്‍ കുതിച്ചെത്തും.
ടാറ്റ നെക്‌സോണ്‍, മഹീന്ദ്ര എക്‌സ് യു വി 3എക്‌സ്ഒ, മാരുതി ബ്രസ, ഹ്യുണ്ടേയ് വെന്യു, കിയ സോനറ്റ് എന്നിങ്ങനെ വിപണിയില്‍ പയറ്റി തെളിഞ്ഞ മോഡലുകളോടാണ് കൈലാഖിൻ്റെ മത്സരം.
Latest
വാര്‍ഡ് പ്രസിഡന്റുമാര്‍ക്ക് മാര്‍ഗരേഖയുമായി കെ പി സി സി
പാതിവില തട്ടിപ്പ്: ലാലി വിന്‍സെന്റിന് മുന്‍കൂര്‍ ജാമ്യം
ആശാ വര്‍ക്കര്‍മാരുടെ സമരത്തിന് പിന്നില്‍ അരാജക സംഘടനകളെന്ന് എളമരം കരീം
തമിഴ്നാട്ടില്‍ വാഹനാപകടം; മഞ്ചേരി സ്വദേശികളായ പിതാവും മകനും മരിച്ചു
നഴ്‌സിങ് കോളജില്‍ അഡ്മിഷന്‍ വാങ്ങിക്കൊടുക്കാമെന്ന് പറഞ്ഞ് പണം തട്ടി; പ്രതി അറസ്റ്റില്‍
കണ്ണില്ലാത്ത ക്രൂരത; അരുംകൊലകളില്‍ നടുങ്ങി തലസ്ഥാനം
