കോഴിക്കോട്-ഒമാന്‍ വിമാന സര്‍വീസുകള്‍ വര്‍ധിപ്പിച്ച് എയര്‍ ഇന്ത്യ

മസ്‌കത്ത് | കോഴിക്കോട് നിന്ന് ഒമാനിലെ സലാലയിലേക്കുള്ള സര്‍വീസുകള്‍ വര്‍ധിപ്പിച്ച് എയര്‍ ഇന്ത്യ എക്‌സ്പ്രസ്സ്. ആഴ്ചയില്‍ രണ്ട് ദിവസമായിരിക്കും പുതിയ ഷെഡ്യൂള്‍ പ്രകാരമുള്ള സര്‍വീസുകള്‍.

ഞായര്‍, വ്യാഴം ദിവസങ്ങളിലായിരിക്കും അധിക സര്‍വീസ്. ടിക്കറ്റ് ബുക്കിങ് ആരംഭിച്ചിട്ടുണ്ട്. 44 റിയാല്‍ മുതലാണ് നിലവിലെ ടിക്കറ്റ് നിരക്ക്. എയര്‍ ഇന്ത്യ എക്‌സ്പ്രസ്സ് വെബ്‌സൈറ്റ് വഴിയും ട്രാവല്‍ ഏജന്‍സികള്‍ മുഖേനയും ടിക്കറ്റ് ബുക്ക് ചെയ്യാം.

സലാലയില്‍ നിന്ന് രാവിലെ 10.55ന് പുറപ്പെടുന്ന വിമാനം വൈകിട്ട് 4.15ന് കോഴിക്കോട്ടെത്തും. കോഴിക്കോട് നിന്നും പ്രാദേശിക സമയം രാവിലെ 7.25ന് പുറപ്പെടുന്ന വിമാനം പത്തോടെ സലാലയിലെത്തും. ഞായര്‍, വ്യാഴം ദിവസങ്ങളില്‍ ഇതേ ഷെഡ്യൂള്‍ പ്രകാരം തന്നെയാണ് സര്‍വീസുകള്‍. ദോഫാര്‍, അല്‍ വുസ്ത മേഖലകളില്‍ നിന്നുള്ള പ്രവാസികള്‍ക്ക് വലിയ ആശ്വാസമാണ് ഈ സര്‍വീസുകള്‍.