Kerala
എ കെ ഷാനിബ് മത്സരിക്കില്ല; സരിന് പിന്തുണ
വി ഡി സതീശന്റെയും ഷാഫി പറമ്പിലിന്റെയും ഏകാധിപത്യ നിലപാടിന് എതിരായ പോരാട്ടം തുടരും.
പാലക്കാട് | കോണ്ഗ്രസ്സ് വിമതനും പാലക്കാട്ടെ സ്വതന്ത്ര സ്ഥാനാര്ഥിയുമായ എ കെ ഷാനിബ് മത്സരത്തില് നിന്ന് പിന്മാറി. ഇടത് സ്ഥാനാര്ഥി സരിന് പിന്തുണ നല്കുമെന്ന് ഷാനിബ് അറിയിച്ചു.
സരിനുമായുള്ള കൂടിക്കാഴ്ചക്കു ശേഷമാണ് ഷാനിബിന്റെ തീരുമാനം. വി ഡി സതീശന്റെയും ഷാഫി പറമ്പിലിന്റെയും ഏകാധിപത്യ നിലപാടിന് എതിരായ പോരാട്ടം തുടരുമെന്ന് അദ്ദേഹം പറഞ്ഞു. സരിനു വേണ്ടി പ്രചാരണത്തിന് ഇറങ്ങുമെന്നും ഷാനിബ് വ്യക്തമാക്കി.
സ്ഥാനാര്ഥിത്വത്തില് നിന്ന് പിന്മാറണമെന്ന് ഷാനിബിനോട് സരിന് അഭ്യര്ഥിച്ചിരുന്നു. ഷാനിബ് ഉയര്ത്തിയ രാഷ്ട്രീയം എല്ലാവരും സ്വീകരിച്ചു. ഷാനിബിന്റേത് ഒറ്റപ്പെട്ട ശബ്ദമാകരുത്. ഷാനിബ് തന്നെ പിന്തുണക്കണം. ഷാനിബ് പത്രിക നല്കുന്നില്ലെങ്കില് നേരിട്ട് കാണാന് തയ്യാറാണെന്നും സരിന് പറഞ്ഞിരുന്നു.
എന്നാല്, തന്റെ സ്ഥാനാര്ഥിത്വത്തില് മാറ്റമില്ലെന്നായിരുന്നു ഷാനിബ് ആദ്യം വ്യക്തമാക്കിയിരുന്നത്. യൂത്ത് കോണ്ഗ്രസ്സ് മുന് ജനറല് സെക്രട്ടറിയാണ് ഷാനിബ്.