പന്തീരാങ്കാവില്‍ ഗാര്‍ഹിക പീഡനത്തിന് ഇരയായ പെണ്‍കുട്ടിക്ക് എല്ലാ പിന്തുണയും നല്‍കും ;വനിത കമ്മീഷന്‍

കോഴിക്കോട് | കോഴിക്കോട് പന്തീരാങ്കാവില്‍ ഭര്‍ത്താവില്‍ നിന്നും ഗാര്‍ഹിക പീഡനത്തിന് ഇരയായ പെണ്‍കുട്ടിക്ക് എല്ലാ വിധത്തിലുള്ള പിന്തുണയും നല്‍കുമെന്ന് വനിത കമ്മിഷന്‍ അധ്യക്ഷ പി സതീദേവി.

പോലീസിന് നിയമങ്ങളെക്കുറിച്ച് അവബോധം ഉണ്ടായിരിക്കണമെന്നും ഭര്‍ത്താവില്‍ നിന്ന് ശാരീരിക പീഡനം ഏല്‍ക്കുന്നതില്‍ തെറ്റില്ലെന്ന് കരുതുന്ന പോലീസുകാര്‍ സേനയ്ക്ക് നാണക്കേടാണെന്നും പി സതീദേവി പറഞ്ഞു.

പെണ്‍കുട്ടിയെ ഫോണില്‍ വിളിച്ച് സംസാരിച്ചെന്നും പെണ്‍കുട്ടി ഉന്നയിച്ച ആരോപണങ്ങള്‍ എല്ലാം തന്നെ ശരിയാണെന്നും പി സതീദേവി പറഞ്ഞു. ഇത്തരം പീഡനങ്ങള്‍ വിദ്യാസമ്പന്നരായ പെണ്‍കുട്ടികള്‍ക്ക് പോലും നേരിടേണ്ടി വരുന്നു എന്നത് ഗൗരവകരമായ സംഭവമാണെന്നും പെണ്‍കുട്ടിക്ക് നിയമപരമായും എല്ലാവിധ പിന്തുണയും നല്‍കുമെന്നും അവര്‍ കൂട്ടിച്ചേര്‍ത്തു.