കള്ളപ്പണ ആരോപണം; രാഹുല്‍ മാങ്കൂട്ടത്തില്‍ ഹോട്ടലില്‍ നിന്ന് പോയത് ട്രോളി ബാഗ് കയറ്റിയ വാഹനത്തിലല്ല: ദൃശ്യങ്ങൾ പുറത്തുവിട്ട് സി പി എം

പാലക്കാട് | കോണ്‍ഗ്രസിന് എതിരായ കള്ളപ്പണ ആരോപണത്തില്‍ കൂടുതല്‍ ദൃശ്യങ്ങള്‍ പുറത്ത് വിട്ട് സിപിഎം. കള്ളപ്പണം കടത്തിയെന്ന് ആരോപിക്കുന്ന കെപിഎം ഹോട്ടലിന് പുറത്തുള്ള ദൃശ്യങ്ങളാണ് പുറത്ത് വിട്ടത്.

രാഹുല്‍ മാങ്കൂട്ടത്തില്‍ ഹോട്ടലില്‍ നിന്ന് പോയത് ബാഗുകള്‍ കയറ്റിയ കാറിലല്ലെന്നും രാഹുല്‍ പോയത് ഗ്രെ കളര്‍ ഇന്നോവയിലാണെന്നും കാണിക്കുന്നതാണ് ദൃശ്യം.

രണ്ടു ബാഗും കയറ്റിയ ഇന്നോവ കാര്‍ രാഹുല്‍ സഞ്ചരിച്ച വാഹനത്തിന്റെ പിന്നിലായാണ് സഞ്ചരിച്ചതെന്ന് ദൃശ്യങ്ങളില്‍ വ്യക്തമാകുന്നു. വസ്ത്രങ്ങളുള്ള ബാ​ഗാണെങ്കിൽ രാഹുൽ മാങ്കൂട്ടത്തിൽ എന്തുകൊണ്ട് ആ കാറിൽ പോയില്ലെന്നാണ് സിപിഎം ചോദിക്കുന്നത്. കെപിഎം ഹോട്ടലിന്റെ പുറത്തുള്ള പാര്‍ക്കിംഗ് ബേയിലെ സിസിടിവി ദൃശ്യങ്ങളാണ് ഇപ്പോള്‍ പുറത്ത് വന്നിരിക്കുന്നത്.

ഇന്നലെ ഹോട്ടലിൻ്റെ അകത്തുള്ള ദൃശ്യങ്ങൾ സിപിഎം പുറത്തുവിട്ടിരുന്നു. ദൃശ്യങ്ങളിൽ കെഎസ്‍യു നേതാവായ ഫെന്നി നൈനാൻ നീല ട്രോളി ബാ​ഗുമായി പോകുന്നത് കാണാമായിരുന്നു. എന്നാൽ ട്രോളി ബാ​ഗിൽ വസ്ത്രങ്ങളായിരുന്നുവെന്നാണ് രാഹുൽ മാങ്കൂട്ടത്തില്‍ പ്രതികരിച്ചത്.