യുകെയിലും എത്തി; കൂടുതല്‍ രാജ്യങ്ങളിലേക്ക് മെറ്റാ എഐ

ന്യൂഡല്‍ഹി| ഇന്‍-ഹൗസ് ആര്‍ട്ടിഫിഷ്യല്‍ ഇന്റലിജന്‍സ് (എഐ) ചാറ്റ്ബോട്ടായ മെറ്റാ എഐയുടെ വിപുലീകരണം ആറ് പുതിയ രാജ്യങ്ങളിലേക്കുകൂടി വ്യാപിപ്പിച്ച് മെറ്റാ. ബ്രിട്ടന്‍, ബ്രസീല്‍, ബൊളീവിയ, ഗ്വാട്ടിമാല, പരാഗ്വേ, ഫിലിപ്പീന്‍സ് എന്നിവിടങ്ങളിലേക്കാണ് മെറ്റാ എഐയുടെ സേവനം നീട്ടിയത്. ഈ രാജ്യങ്ങളില്‍ ഇനിമുതല്‍ മെറ്റാ എഐ ഉപയോഗിക്കാം.
ഉടന്‍ തന്നെ 15 രാജ്യങ്ങളിലേക്ക് കൂടി വ്യാപിപ്പിക്കുമെന്ന് സോഷ്യല്‍ മീഡിയ ഭീമന്‍ വ്യക്തമാക്കി. ഇതോടെ ആകെ 43 രാജ്യങ്ങളില്‍ മെറ്റാ എഐയുടെ സാന്നിധ്യം ഉറപ്പാകും.

സോഷ്യല്‍ മീഡിയ ആപ്പുകള്‍ക്കു പുറമേ, മറ്റ് ഉല്‍പ്പന്നങ്ങളിലേക്കും വോയ്സ് ബേസ്ഡ് എഐ കമ്പനി വാഗ്ദാനം ചെയ്തതുടങ്ങി. ഇതിന്റെ ഭാഗമായി യുകെയിലും ഓസ്ട്രേലിയയിലും മെറ്റാ എഐ പിന്തുണയ്ക്കുന്ന റേ-ബാന്‍ മെറ്റാ സ്മാര്‍ട്ട് ഗ്ലാസുകള്‍ അവതരിപ്പിച്ചു.

ഫിലിപ്പീന്‍സിലെ തഗാലോഗ് ഭാഷയിലും മെറ്റാ എഐ സംസാരിക്കും. പുതുതായി അള്‍ജീരിയ, ഈജിപ്ത്, ഇന്തോനേഷ്യ, ഇറാഖ്, ജോര്‍ദാന്‍, ലിബിയ, മലേഷ്യ, മൊറോക്കോ, സൗദി അറേബ്യ, സുഡാന്‍, തായ്ലന്‍ഡ്, ടുണീഷ്യ, യുണൈറ്റഡ് അറബ് എമിറേറ്റ്സ്, വിയറ്റ്നാം, യെമന്‍ എന്നിവയുള്‍പ്പെടെ 15 രാജ്യങ്ങളിലേക്ക് കൂടിയാണ് ചാറ്റ്‌ബോട്ട് വ്യാപിപ്പിക്കാന്‍ പോകുന്നത്. അറബിക്, ഇന്തോനേഷ്യന്‍, തായ്, വിയറ്റ്‌നാമീസ് ഭാഷകളില്‍ എഐ സേവനം ലഭിക്കും. ഈ വര്‍ഷം അവസാനം ഇവിടെ ലോഞ്ചിങ് ഉണ്ടാകുമെന്നാണ് പ്രതീക്ഷിക്കുന്നത്.