തൃശൂരിൽ നിയന്ത്രണംവിട്ട കാർ കടയിലേക്ക് ഇടിച്ചുകയറി അപകടം; ഒരാള്‍ മരിച്ചു

തൃശൂര്‍ | തൃശൂരില്‍ നിയന്ത്രണംവിട്ട കാര്‍ കടയിലേക്ക് ഇടിച്ചുകയറി 60കാരന്‍ മരിച്ചു. പഴുവില്‍ സ്വദേശി വേളൂക്കര ഗോപി ആണ് മരിച്ചത്. ചാഴൂരില്‍ തെക്കേലിന് സമീപം ഇന്ന് രാവിലെയാണ് അപകടമുണ്ടായത്. അപകടത്തില്‍ രണ്ടുപേര്‍ക്ക് പരുക്കേറ്റു.

പെരിങ്ങോട്ടുകര ഭാഗത്തുനിന്ന് തൃശ്ശൂര്‍ ഭാഗത്തേക്ക് പോകുകയായിരുന്ന കാര്‍ നിയന്ത്രണംവിട്ട് തട്ടുകടയിലേക്ക് ഇടിച്ചുകയറുകയായിരുന്നു. തട്ടുകടയുടെ മുമ്പില്‍ നിന്നും പത്രം വായിക്കാന്‍ വന്നിരുന്നതായിരുന്നു ഗോപി.അപകടം നടന്ന ഉടനെ തന്നെ ഗോപിയെ നാട്ടുകാര്‍ ചേര്‍ന്ന് ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.

ഗോപിക്ക് സമീപം ഉണ്ടായിരുന്ന ലോട്ടറി കച്ചവടക്കാരനായ അന്തോണി, ശ്രീധരന്‍ എന്നിവര്‍ക്കാണ് അപകടത്തില്‍ പരുക്കേറ്റത്. ഇടിയുടെ ആഘാതത്തില്‍ കടയുടെ മുന്‍ഭാഗം പൂര്‍ണമായും തകര്‍ന്നു.