അറബ് ഹെൽത്ത് ദൈനംദിന ഓഫീസ് ജോലികൾക്ക് എ ഐ ജീവനക്കാർ; റോബോട്ടിക് പ്രോസസ് ഓട്ടോമേഷനുമായി ഡി എച്ച് എ

ദുബൈ | ദൈനംദിന ഓഫീസ് ജോലികൾക്ക് എ ഐ ജീവനക്കാർ വരുന്നു. ദുബൈ ഹെൽത്ത് അതോറിറ്റി (ഡി എച്ച് എ)യാണ് പുതിയ റോബോട്ടിക് പ്രോസസ് ഓട്ടോമേഷൻ (ആർ പി എ) സാങ്കേതികവിദ്യയുമായി രംഗത്തെത്തിയിരിക്കുന്നത്. 24 മണിക്കൂർ സമയം എടുത്തിരുന്ന ജോലികൾ എ ഐ, മെഷീൻ ലേണിംഗ് എന്നിവ സംയോജിപ്പിച്ച് രണ്ട് മിനിറ്റിനുള്ളിൽ പൂർത്തിയാക്കാനാവും.

സമയം കുറയ്ക്കുകയും പ്രവർത്തനങ്ങൾ കാര്യക്ഷമമാക്കുകയും ചെയ്തുകൊണ്ട് ജോലി പരിവർത്തനം ചെയ്യുന്നതിനാണ് ഈ സംവിധാനം സജ്ജീകരിച്ചിരിക്കുന്നതെന്ന് ഡി എച്ച് എ, ഐ ടി ഡയറക്ടർ മജീദ് സുൽത്താൻ അൽ മെഹെരി പറഞ്ഞു. ദൈനംദിന പ്രവർത്തനങ്ങളിൽ ഈ സാങ്കേതികവിദ്യ ഉപയോഗിക്കുന്ന ആദ്യത്തെ സ്ഥാപനമായി മാറുകയാണ് അതോറിറ്റി.
വെർച്വൽ ജീവനക്കാരന് വർഷം മുഴുവനും ഒന്നിലധികം ജോലികൾ ചെയ്യാൻ കഴിയും. മനുഷ്യ ഇടപെടലില്ലാതെ പൂർത്തിയാക്കാവുന്ന പത്ത് സേവനങ്ങൾ നടത്തുന്ന രണ്ട് ആർ പി എ സംവിധാനങ്ങൾ ഇതിനകം വിന്യസിച്ചിട്ടുണ്ട്.

ഈ വർഷാവസാനം രണ്ടെണ്ണം കൂടി ചേർക്കും. കൂടുതൽ ക്രിയാത്മകവും തന്ത്രപരവുമായ റോളുകളിൽ ശ്രദ്ധ കേന്ദ്രീകരിക്കാൻ മനുഷ്യ ജീവനക്കാരെ സ്വതന്ത്രരാക്കുകയും പതിവ്, ആവർത്തന, അടിസ്ഥാന ടാസ്‌ക്കുകൾ വെർച്വൽ ജീവനക്കാർ നിർവഹിക്കുകയും ചെയ്യുന്ന രീതിയാണ് രൂപകൽപ്പന ചെയ്തിരിക്കുന്നതെന്നും അദ്ദേഹം പറഞ്ഞു.