ലോകകപ്പ് യോഗ്യതാ മത്സരത്തിൽ ബ്രസീലിനെ തകർത്ത് അർജന്റീന

റിയോഡി ജനീറോ |ലോകകപ്പ് യോഗ്യതാ പോരാട്ടത്തിൽ ബ്രസീലിനെ തകർത്ത് അർജന്റീന. മാരാക്കാന സ്റ്റേഡിയത്തിൽ ആവേശം അലതല്ലിയ പോരാട്ടത്തിൽ ഏകപക്ഷീയമായ ഒരു ഗോളിനാണ് അർജന്റീനയുടെ വിജയം. 63-ാം മിനിറ്റിൽ ബുള്ളറ്റ് ഹെഡറിലൂടെ ഒറ്റമെൻഡിയാണ് അർജന്റീനക്കായി വല കുലുക്കിയത്.

81-ാം മിനിറ്റിൽ, അർജന്റീന മധ്യനിരക്കാരൻ ഡി പോളിനെ ഫൗൾ ചെയ്തതതിന് ജോലിൻടൺ ചുവപ്പ് കാർഡ് കണ്ട് പുറത്തായതോടെ ബ്രസീൽ 10 പേരുമായാണ് കളിച്ചത്.

ലോകകപ്പ് യോഗ്യതാ പോരാട്ടത്തിൽ ആറ് മത്സരങ്ങളിൽ നിന്ന് 15 പോയിന്റ് നേടിയ അർജന്റീന ഒന്നാം സ്ഥാനത്താണ്. തുടർച്ചയായ നാലാം മത്സരത്തിലും വിജയിക്കാനാവാത്ത ബ്രസീൽ പതറുകയാണ്. ആറു മത്സരങ്ങളിൽനിന്ന് ഏഴു പോയിന്റ് മാത്രമാണ് ബ്രസീലിന് ലഭിച്ചത്.

നേരത്തെ കളി തുടങ്ങുന്നതിന് മുമ്പ് അർജന്റീന – ബ്രസീൽ ആരാധകർ തമ്മിൽ ഏറ്റുമുട്ടുണ്ടായി. തുടർന്ന് അര മണിക്കൂർ വൈകിയാണ് മത്സരം ആരംഭിച്ചത്. അർജന്റീന ആരാധകർക്കെതിരെ പൊലീസ് നടത്തിയ ലാത്തി ചാർജിൽ നിരവധിപേർക്ക് ഗുരുതരമായി പരിക്കേറ്റിട്ടുണ്ട്.