ജമ്മു കശ്മീരില്‍ സൈന്യം ലശ്കര്‍ കമാന്‍ഡറെ വധിച്ചു

ശ്രീനഗര്‍ |  ജമ്മു കശ്മീരിലെ ശ്രീനഗറിലുണ്ടായ ഏറ്റുമുട്ടലില്‍ ലശ്കര്‍ കമാന്‍ഡറെ സുരക്ഷാ സേന വധിച്ചു. കശ്മീരിലെ നിരവധി ആക്രമണങ്ങളുടെ പിന്നില്‍ പ്രവര്‍ത്തിച്ച ഉസ്മാനെയാണ് വധിച്ചതെന്ന് സൈന്യം അറിയിച്ചു. ശ്രീനഗറിലെ ജനവാസമേഖലയായ ഖന്യാറിലുണ്ടായ ഏറ്റുമുട്ടലിലാണ് പാക്ക് ഭീകരന്‍ കൊല്ലപ്പെട്ടത്.

ഏറ്റുമുട്ടലില്‍ രണ്ടു സിആര്‍പിഎഫ് ജവാന്മാര്‍ക്കും രണ്ടു പോലീസ് ഉദ്യോഗസ്ഥര്‍ക്കും പരുക്കേറ്റു. അനന്ത്‌നാഗ് ഉള്‍പ്പെടെ നിരവധി കേന്ദ്രങ്ങളില്‍ ശനിയാഴ്ച ഏറ്റുമുട്ടലും നടന്നിരുന്നു.

അനന്ത്‌നാഗില്‍ നടന്ന മറ്റൊരു ഏറ്റുമുട്ടലില്‍ സുരക്ഷാസേന രണ്ടു ഭീകരരെ വധിച്ചു. ഒരാള്‍ രക്ഷപെട്ടു എന്ന സൂചനയെ തുടര്‍ന്ന് സ്ഥലത്ത് സൈന്യത്തിന്റെ നേതൃത്വത്തില്‍ തിരച്ചില്‍ തുടങ്ങി.