മഴ പെയ്തതോടെ കുട്ടികള്‍ തിക്കിത്തിരക്കി ഓടി; ഓഡിറ്റോറിയത്തിന് ഉണ്ടായിരുന്നത് ഒരേയൊരു വാതില്‍

കൊച്ചി | കുസാറ്റില്‍ ദുരന്തത്തിനിടയാക്കിയത് മഴയും അമിതമായ തിരക്കും ഇടുങ്ങിയ വഴിയും. പരിപാടി തുടങ്ങിയതോടെ ആളുകള്‍ കൂടി. വൈകിട്ട് ഏഴോടെ പ്രദേശത്ത് മഴ പെയ്തു. ഇതോടെ കുട്ടികള്‍ തിക്കിത്തിരക്കി ഓടി. ഓഡിറ്റോറിയത്തിലേക്കുള്ള പടിക്കെട്ടുകള്‍ കയറുന്നതിനിടെ പലരും വീണു.

പരിപാടി നടക്കുന്ന ഓപണ്‍ എയര്‍ ഓഡിറ്റോറിയത്തിന് ഒരു വാതിലേ ഉണ്ടായിരുന്നുള്ളൂ. നിലത്തുവീണവരെ ചവിട്ടിയാണ് മറ്റുള്ളവര്‍ മുന്നോട്ടു പോകാന്‍ ശ്രമിച്ചത്. ചവിട്ടേറ്റ് ശ്വാസതടസ്സം ഉള്‍പ്പെടെയുള്ള പ്രശ്‌നങ്ങളുണ്ടായവരെ ആശുപത്രിയില്‍ എത്തിച്ചെങ്കിലും നാല് പേരെ രക്ഷിക്കാനായില്ല.

2500ഓളം പേര്‍ പരിപാടിക്ക് എത്തിയതായാണ് പ്രിന്‍സിപ്പല്‍ പറയുന്നത്. വേണ്ടത്ര സുരക്ഷാ നടപടികള്‍ സ്വീകരിക്കാതെയാണ് പരിപാടി നടത്തിയതെന്നാണ് പ്രാഥമിക നിഗമനം.