സമരം കടുപ്പിക്കാന്‍ ആശമാരുടെ സംഘടന; ഇന്ന് ആലപ്പുഴ, മലപ്പുറം കലക്ട്രേറ്റുകളിലേക്ക് മാര്‍ച്ച്

തിരുവനന്തപുരം| ആശവര്‍ക്കാര്‍മാരുടെ സെക്രട്ടേറിയറ്റിന് മുന്നിലെ സമരം പതിനെട്ടാം ദിവസത്തിലേക്ക് കടന്നു. തുടര്‍ന്ന് സംസ്ഥാന വ്യാപകമായി സമരം ശക്തമാക്കാന്‍ ഒരുങ്ങുകയാണ് ആശ വര്‍ക്കര്‍മാരുടെ സംഘടന. കേരള ആശ ഹെല്‍ത്ത് വര്‍ക്കേഴ്‌സ് അസോസിയേഷന്റെ നേതൃത്വത്തില്‍ ഇന്ന് ആലപ്പുഴ, മലപ്പുറം കലക്ട്രേറ്റുകളിലേക്ക് മാര്‍ച്ച് നടത്തും.

കോണ്‍ഗ്രസും പോഷകസംഘടനകളും സംസ്ഥാന വ്യാപകമായി പ്രതിഷേധിക്കും. മാര്‍ച്ച് 3ന് നിയമസഭാ മാര്‍ച്ച് നടത്തും. സെക്രട്ടറിയേറ്റിന് മുന്നിലെ രാപകല്‍ സമരത്തിന് നേതൃത്വം നല്‍കുന്ന കേരള ആശ ഹെല്‍ത്ത് വര്‍ക്കേഴ്‌സ് അസോസിയേഷനാണ് നിയമസഭ മാര്‍ച്ച് പ്രഖ്യാപിച്ചിരിക്കുന്നത്.

ആശമാര്‍ക്ക് പിന്തുണയുമായി അടുത്ത മാസം മൂന്നിന് കോണ്‍ഗ്രസ്സ് സെക്രട്ടേറിയറ്റിലേക്ക് മാര്‍ച്ച് നടത്തും. കലക്ടറേറ്റുകളിലേക്ക് പ്രതിഷേധ റാലിയും സംഘടിപ്പിക്കും. ആശമാര്‍ക്ക് സ്ഥിര നിയമനം നല്‍കണമെന്ന് ഐ എന്‍ ടി യു സിയും ആവശ്യപ്പെട്ടു. തുടര്‍ച്ചയായി അഞ്ച് വര്‍ഷം സേവനം പൂര്‍ത്തീകരിച്ചവര്‍ക്ക് ഏതെങ്കിലും തസ്തികയില്‍ സ്ഥിരനിയമനം നല്‍കണമെന്ന് സംസ്ഥാന അധ്യക്ഷന്‍ ആര്‍ ചന്ദ്രശേഖരന്‍ ആവശ്യപ്പെട്ടു. സമരം ന്യായമാണെങ്കിലും ഓണറേറിയം വര്‍ധിപ്പിക്കുക മാത്രമല്ല ചെയ്യേണ്ടതെന്നും അദ്ദേഹം പറഞ്ഞു.

അതേസമയം, ആശാവര്‍ക്കര്‍മാരുടെ സമരത്തെ നേരിടാന്‍ സര്‍ക്കാര്‍ ബദല്‍ മാര്‍ഗം ഏര്‍പ്പെടുത്താനൊരുങ്ങി. ജനങ്ങള്‍ക്ക് ആരോഗ്യ സേവനങ്ങള്‍ ഉറപ്പുവരുത്താന്‍ സന്നദ്ധ പ്രവര്‍ത്തകരെ നിയോഗിക്കണമെന്ന് ആരോഗ്യ വകുപ്പ് ജില്ലാ മെഡിക്കല്‍ ഓഫീസര്‍മാര്‍ക്ക് നിര്‍ദേശം നല്‍കി. ആശാവര്‍ക്കര്‍മാര്‍ എത്രയും വേഗം തിരികെ ജോലിയില്‍ പ്രവേശിക്കണമെന്നാണ് സര്‍ക്കാര്‍ നിര്‍ദേശം. സമരത്തിന് പിന്നില്‍ അരാജകത്വശക്തികള്‍ ഉണ്ടെന്ന് സി പി എം സംസ്ഥാന സെക്രട്ടറി എം വി ഗോവിന്ദന്‍ ആരോപിച്ചിരുന്നു.