അടൂരിൽ ബ്രൗൺ ഷുഗറുമായി ആസാം സ്വദേശി പിടിയിൽ

അടൂർ | ബ്രൗൺ ഷുഗറുമായി ആസാം സ്വദേശി പിടിയിൽ. ആസാം മുരിഗാവോൺ സ്വദേശി ഫക്രുദ്ദീൻ അലി(30)യെയാണ് ജില്ലാ ഡാൻസാഫ് സംഘവും അടൂർ പോലീസും ചേർന്ന് അറസ്റ്റ് ചെയ്തത്. 11 ഗ്രാം ബ്രൗൺ ഷുഗറാണ് ഇയാളിൽ നിന്ന് പിടികൂടിയത്.

വ്യാഴാഴ്ച പുലർച്ചെ 12.30ന് പഴകുളം പൗദാസം മുക്കിന് സമീപത്തു നിന്നുമാണ് ഫക്രുദ്ദീൻ അലിയെ പോലീസ് പിടികൂടുന്നത്. 2023ൽ ഒക്ടോബറിൽ 3.60 ഗ്രാം ബ്രൗൺ ഷുഗറുമായി ഫക്രുദ്ദീനേയും ഭാര്യയേയും അടൂർ വടക്കടത്തുകാവിലുള്ള വാടക വീട്ടിൽ നിന്നും പോലീസ് പിടികൂടിയിരുന്നു.

ജില്ലാ പോലീസ് മേധാവി വി അജിത്തിന് ലഭിച്ച രഹസ്യ വിവരത്തെ തുടർന്നായിരുന്നു പരിശോധന. അടൂർ ഡിവൈഎസ്പി നിയാസിന്റെ മേൽനോട്ടത്തിൽ അടൂർ സിഐ ശ്യാം മുരളി, എസ്‌ഐ കെ എസ് ധന്യ, എസ്‌സിപിഒ സുനിൽ, സിപിഒമാരായ രാഹുൽ, ശ്യാം എന്നിവരുടെ നേതൃത്വത്തിലായിരുന്നു അറസ്റ്റ്.