യുവതിയെ പെട്രോള്‍ ഒഴിച്ച് കത്തിക്കാന്‍ ശ്രമം; ഭര്‍ത്താവ് അറസ്റ്റില്‍

പത്തനംതിട്ട | യുവതിയെ പെട്രോള്‍ ഒഴിച്ച് കത്തിച്ചും കത്തികൊണ്ട് കുത്തിയും കൊലപ്പെടുത്താന്‍ ശ്രമിച്ച ഭര്‍ത്താവിനെ കൊടുമണ്‍ പോലീസ് അറസ്റ്റ് ചെയ്തു. അങ്ങാടിക്കല്‍ തെക്ക് കിഴക്കേ ചരുവില്‍ വീട്ടില്‍ കെ ദിനേശ് (46) ആണ് പിടിയിലായത്.

അവിഹിതബന്ധം ഉണ്ടെന്ന് ആരോപിച്ചായിരുന്നു യുവതിയുടെ കുടുംബവീട്ടില്‍ ബുധനാഴ്ച അതിക്രമിച്ചകയറിയ ദിനേശ് പെട്രോള്‍ ഒഴിച്ച് കത്തിച്ചു കൊല്ലാന്‍ ശ്രമിച്ചത്. കൈയില്‍ കരുതിയിരുന്ന പെട്രോള്‍ നിറച്ച കുപ്പി വീട്ടിലെ ഹാളില്‍ വച്ച് യുവതിയുടെയും വീട്ടുകാരുടെയും ദേഹത്തേക്ക് ഒഴിക്കുകയായിരുന്നു. തുടര്‍ന്ന് കൈയിലിരുന്ന കത്തികൊണ്ട് യുവതിയെ കുത്താനും ശ്രമിച്ചു. സിഗരറ്റ് ലാമ്പ് എടുത്ത് കത്തിക്കാന്‍ തുടങ്ങിയപ്പോള്‍ യുവതിയുടെ പിതാവും മകളും മറ്റും ചേര്‍ന്ന് തടയാന്‍ മുതിര്‍ന്നു. കത്തികൊണ്ടുള്ള കുത്ത് തടയാന്‍ ശ്രമിച്ച വീട്ടിലെ കാര്‍ ഡ്രൈവര്‍ നിര്‍മലിന്റെ ഇടതുകൈക്കും പരുക്കേറ്റു. യുവതിയെയും നിര്‍മലിനെയും പ്രതി മര്‍ദിക്കുകയും ചെയ്തു.

ശാസ്ത്രീയ അന്വേഷണ സംഘവും പോലീസ് ഫോട്ടോഗ്രാഫറും വിരലടയാള വിദഗ്ധരും സ്ഥലത്തെത്തി പരിശോധന നടത്തി ശാസ്ത്രീയ തെളിവുകള്‍ ശേഖരിച്ചു. പ്രതിയെ പെട്രോള്‍ വാങ്ങിയ കൊടുമണ്ണിലെ പമ്പില്‍ എത്തിച്ചും തെളിവെടുപ്പ് നടത്തി. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

അടൂര്‍ ഡി വൈ എസ് പി. ജി സന്തോഷ് കുമാറിന്റെ മേല്‍നോട്ടത്തിലാണ് അന്വേഷണം നടക്കുന്നത്. പോലീസ് ഇന്‍സ്‌പെക്ടര്‍ പി വിനോദിനൊപ്പം എ എസ് ഐ. വിന്‍സെന്റ് സുനില്‍, എസ് സി പി ഒമാരായ തോമസ്, അലക്സ്, സി പി ഒ. സജീല എന്നിവരും സംഘത്തിലുണ്ട്.