കോഴിക്കോട്ട് എട്ട് വയസ്സുകാരിയെ കാറടക്കം തട്ടിക്കൊണ്ടുപോകാന്‍ ശ്രമം

കോഴിക്കോട് | കുറ്റ്യാടിയില്‍ എട്ട് വയസ്സുകാരിയെ വാഹന സഹിതം തട്ടിക്കൊണ്ടുപോകാന്‍ ശ്രമം. കാറില്‍ ഉറങ്ങിക്കിടന്ന മന്‍സൂര്‍- ജല്‍സ ദമ്പതികളുടെ മകളെയാണ് തട്ടിക്കൊണ്ടുപോകാന്‍ ശ്രമിച്ചത്. ഉച്ചയോടെ കുറ്റ്യാടിക്കടുത്ത അകത്തട്ട് വെച്ചാണ് സംഭവം.

സംഭവത്തില്‍ അടുക്കത്ത് സ്വദേശി വിജീഷ് പിടിയിലായി. ഇയാളെ പോലീസ് കസ്റ്റഡിയിലെടുത്ത് വിശദമായി ചോദ്യം ചെയ്തുവരികയാണ്.

കുട്ടി ഉറങ്ങിയതിനാല്‍ കാറില്‍ കിടത്തി കടയിലേക്ക് പോയതായിരുന്നു മന്‍സൂറും ജല്‍സയും. ഈ സമയം പ്രതി കാറും കുട്ടിയുമായി കടന്നുകളയുകയായിരുന്നു. സുഹൃത്തിന്റെ വാഹനത്തില്‍ മന്‍സൂറും ജല്‍സയും കാറിനെ പിന്തുടര്‍ന്നാണ് കുട്ടിയെ രക്ഷിച്ചത്.

കുട്ടിയെ തട്ടിക്കൊണ്ടുപോകാന്‍ ശ്രമിച്ചതിനും മോഷണത്തിനും കുറ്റ്യാടി പോലീസ് കേസ് എടുത്തു. മാതാപിതാക്കളുടെ മൊഴി പോലീസ് രേഖപ്പെടുത്തി.