Kerala
കോഴിക്കോട് എന്ഐടിയില് സമരം ചെയ്ത വിദ്യാര്ത്ഥികള്ക്ക് ആറ് ലക്ഷം രൂപ വീതം പിഴയിട്ട് അധികൃതര്
കാമ്പസില് ഏര്പ്പെടുത്തിയ രാത്രി കര്ഫ്യുവിനെതിരെ 2024 മാര്ച്ച് 22ന് സമരത്തില് പങ്കെടുത്തവര്ക്കെതിരെയാണ് നടപടി.
![](https://assets.sirajlive.com/2024/03/nit-calicut-897x538.jpg)
കോഴിക്കോട്|കോഴിക്കോട് എന്ഐടിയില് സമരം ചെയ്ത അഞ്ച് വിദ്യാര്ത്ഥികള്ക്ക് ആറ് ലക്ഷം രൂപ വീതം പിഴയിട്ട് അധികൃതര്. കാമ്പസില് ഏര്പ്പെടുത്തിയ രാത്രി കര്ഫ്യുവിനെതിരെ 2024 മാര്ച്ച് 22ന് സമരത്തില് പങ്കെടുത്തവര്ക്കെതിരെയാണ് നടപടി. രാമ ക്ഷേത്ര പ്രതിഷ്ഠയുമായി ബന്ധപ്പെട്ട് കാമ്പസില് സംഘര്ഷം നടന്നതിനെ തുടര്ന്നാണ് അധികൃതര് രാത്രി കര്ഫ്യു ഏര്പ്പെടുത്തിയത്.
ഇത് മതേതര ഇന്ത്യയാണ് എന്ന് പ്ലക്കാര്ഡ് ഉയര്ത്തിയതിന് സസ്പെന്റ് ചെയ്യപ്പെട്ട വൈശാഖ് പ്രേംകുമാറിനും ആറ് ലക്ഷം രൂപ അടക്കണമെന്നാവശ്യപ്പെട്ട് നോട്ടീസ് നല്കിയിട്ടുണ്ട്. സമരം കാരണം സ്ഥാപനത്തിന് നഷ്ടം സംഭവിച്ചുവെന്നും പണം അടക്കാതിരിക്കണമെങ്കില് കാരണം കാണിക്കണമെന്നും ആവശ്യപ്പെട്ട് വിദ്യാര്ത്ഥികള്ക്ക് അധികൃതര് നോട്ടീസ് നല്കി. കാമ്പസില് രാത്രി കര്ഫ്യൂ നടപ്പാക്കുന്നതിനെതിരെയും രാത്രി 11 മണിക്ക് കാന്റീന് അടച്ചിടുന്നതിനെതിരെയുമായിരുന്നു വിദ്യാര്ത്ഥികള് കാമ്പസില് സമരം നടത്തിയത്.
സമരത്തിന്റെ ഭാഗമായി എന്ഐടിയുടെ പ്രധാന ഗേറ്റില് വിദ്യാര്ഥികള് ഉപരോധം നടത്തിയിരുന്നു. ഉദ്യോഗസ്ഥരെ കാമ്പസിലേക്ക് കടക്കുന്നത് തടഞ്ഞതടക്കം പ്രതിഷേധം നടന്നിരുന്നു. ഇതെല്ലാം സ്ഥാപനത്തിന് നഷ്ടം സംഭവിക്കാന് കാരണമായെന്നാണ് അധികൃതര് പറയുന്നത്.