അയ്യപ്പഭക്തർ സഞ്ചരിച്ച കാർ നിയന്ത്രണം വിട്ട് സ്വകാര്യ ബസില്‍ ഇടിച്ച് അപകടം; 11 പേര്‍ക്ക് പരുക്ക്

പത്തനംതിട്ട| മൈലപ്ര പള്ളിപ്പിടിക്ക് സമീപം ആന്ധ്രപ്രദേശ് അയ്യപ്പഭക്തര്‍ സഞ്ചരിച്ച കാര്‍ നിയന്ത്രണം വിട്ട് സ്വകാര്യ ബസിലും ഓട്ടോറിക്ഷയിലും ഇടിച്ച് 11 പേര്‍ക്ക് പരുക്ക്. ആരുടെയും നില ഗുരുതരമല്ലെന്ന് ജനറല്‍ ആശുപത്രി അധികൃതര്‍ അറിയിച്ചു.ഇന്ന് ഉച്ചയ്ക്ക് മൂന്ന് മണിയോടെയായിരുന്നു സംഭവം.

ഭക്തര്‍ ദര്‍ശനം കഴിഞ്ഞ് മടങ്ങവെയാണ് അപകടം. ബസില്‍ വന്നിടിച്ച കാര്‍ പിന്നാലെ വന്ന ഓട്ടോറിക്ഷയെയും ഇടിച്ചുതെറിപ്പിക്കുകയായിരുന്നു. ബസിന്റെ ഡ്രൈവര്‍ വശത്തെ ബോഡി ഇളകിപ്പോയി. ഓട്ടോറിക്ഷ തലകീഴായി മറിയുകയും ചെയ്തു.

ബസിലും ഒട്ടോറിക്ഷയിലും സഞ്ചരിച്ച ശോഭന കുമാരി, അനിത ജോണ്‍, മോളി ജോണ്‍, ലക്ഷ്മി, ലീല, അച്യുതന്‍, സതീഷ്‌കുമാര്‍ കാറിലുണ്ടായിരുന്ന ആന്ധ്ര അന്നമയ ജില്ലയിലെ ഹസനാപുരം സ്വദേശികളായ സുബ്ബറായിഡു, വെങ്കിട്ട കൃഷ്ണ, സോമനാഥ സിന്‍ഹ, രവീന്ദ്ര എന്നിവര്‍ക്കാണ് പരുക്കേറ്റത്.കാര്‍ ഡ്രൈവര്‍ ഉറങ്ങിപ്പോയതാകാം അപകടകാരണമെന്നാണ് പോലീസ് വ്യക്തമാക്കുന്നത്.