ബേങ്ക് പണിമുടക്ക് എസ്എസ്എല്‍സി പരീക്ഷകളെ ബാധിക്കില്ല; ചോദ്യപേപ്പര്‍ കൃത്യസമയത്ത് തന്നെ കൈമാറുമെന്ന് യുഎഫ്ബിയു

തിരുവനന്തപുരം| മാര്‍ച്ച് 24, 25 തിയതികളില്‍ നടത്താനിരിക്കുന്ന അഖിലേന്ത്യാ ബേങ്ക് പണിമുടക്ക് എസ്എസ്എല്‍സി പരീക്ഷകളെ ബാധിക്കില്ലെന്ന് യുണൈറ്റഡ് ഫോറം ഓഫ് ബേങ്ക് യൂണിയന്‍ (യുഎഫ്ബിയു). എസ് ബി ഐയുടെ തെരഞ്ഞെടുക്കപ്പെട്ട ശാഖകളില്‍ സൂക്ഷിച്ചിരിക്കുന്ന ചോദ്യപേപ്പറുകള്‍ കൃത്യ സമയത്തു തന്നെ ബേങ്ക് അധികൃതരെത്തി പരീക്ഷാ നടത്തിപ്പുകാര്‍ക്ക് കൈമാറുമെന്നും ഇതിനായി നിര്‍ദേശം നല്‍കിയതായും യുഎഫ്ബിയു അറിയിച്ചു. ബെഫി, എഐബിഇഎ, എഐബിഒസി, എന്‍സിബിഇ അടക്കം ഒമ്പത് യൂണിയനുകളുടെ സംയുക്ത സംഘടനയാണ് യുഎഫ്ബിയു.

ബേങ്കുകളിലെ ഒഴിവുകള്‍ നികത്താന്‍ നിയമനങ്ങള്‍ നടത്തുക, താല്‍ക്കാലിക ജീവനക്കാരെ സ്ഥിരപ്പെടുത്തുക, പ്രവൃത്തി ദിവസം അഞ്ച് ദിവസമാക്കുക എന്നീ ആവശ്യങ്ങള്‍ ഉന്നയിച്ചാണ് സമരം. ലേബര്‍ കമ്മീഷണര്‍ വിളിച്ച് ചേര്‍ത്ത ചര്‍ച്ച ഫലം കാണാത്തതാണ് സമരവുമായി മുന്നോട്ട് പോകാനുള്ള കാരണം. ഇന്ന് ഒരു ചര്‍ച്ച കൂടി നടക്കാനുണ്ട്.

അടിയന്തരമായി ബേങ്ക് ഇടപാടുകള്‍ നടത്താനുള്ളവര്‍ ഇന്ന് തന്നെ നടത്തണം. നാളെ നാലാം ശനിയും മറ്റന്നാള്‍ ഞായറാഴ്ച ആയതിനാലും ബേങ്കുകള്‍ പ്രവര്‍ത്തിക്കില്ല.