ചങ്ങനാശ്ശേരി തെങ്ങണയില്‍ വന്‍ ലഹരിമരുന്ന് വേട്ട

ചങ്ങനാശ്ശേരി|ചങ്ങനാശ്ശേരിയില്‍ നിന്നും കഞ്ചാവും ഹെറോയിനുമായി ഇതര സംസ്ഥാന തൊഴിലാളിയെ എക്‌സൈസ് അറസ്റ്റ് ചെയ്തു. പശ്ചിമബംഗാള്‍ മാള്‍ഡ ജില്ല സ്വദേശി കുത്തുബ്ഗന്‍ജ് മുബാറക് അലി (37) ആണ്  പിടിയിലായത്. 52 ഗ്രാം ഹെറോയിനും, 20 ഗ്രാം കഞ്ചാവും ഇയാളില്‍ നിന്നും കണ്ടെടുത്തു. ചങ്ങനാശ്ശേരി തെങ്ങണ മെഡിക്കല്‍ മിഷന്‍ ആശുപത്രിക്ക് സമീപം റോഡരികില്‍ വച്ചാണ് ഹെറോയിനും, കഞ്ചാവുമായി ഇയാള്‍ പിടിയിലായത്.

പശ്ചിമ ബംഗാളില്‍ നിന്ന് എത്തിച്ച ലഹരി വസ്തുക്കള്‍ ചെറുപൊതികളിലാക്കിയാണ് ആവശ്യക്കാര്‍ക്ക് നല്‍കി വരുന്നത്. ഒരു പൊതിക്ക് 500 രൂപ നിരക്കിലാണ് ഇവര്‍ വില്‍പന നടത്തിയിരുന്നതെന്നും എക്‌സൈസ് അധികൃതര്‍ പറഞ്ഞു. മുപ്പത്തിയയ്യായിരം രൂപയും ഇയാളില്‍ നിന്നും കണ്ടെടുത്തു.

തെങ്ങണയില്‍ തൊഴിലാളി എന്ന പേരില്‍ വാടകക്ക് വീട് എടുത്ത് താമസിച്ചു കൊണ്ടായിരുന്നു ഇവ വില്‍പന നടത്തി വന്നിരുന്നത്. ചങ്ങനാശ്ശേരി കോടതിയില്‍ പ്രതിയെ ഹാജരാക്കും.