പൊട്ടിവീണ വൈദ്യുതി ലൈനില്‍ നിന്ന് ഷോക്കേറ്റ് ബൈക്ക് യാത്രക്കാരന് പരുക്ക്

കോഴിക്കോട്| ബൈക്കില്‍ പോകുന്നതിനിടെ പൊട്ടിവീണ വൈദ്യുതി ലൈനില്‍ നിന്ന് ഷോക്കേറ്റ് യുവാവിന് പരുക്ക്. മുക്കം സ്വദേശി ബാബു സക്കറിയയ്ക്കാണ് പരുക്കേറ്റത്. കോഴിക്കോട് കോടഞ്ചേരി തമ്പലമണ്ണയില്‍ ഇന്നലെ രാത്രിയാണ് സംഭവം. ബാബു സക്കറിയയെ തിരുവമ്പാടിയിലെ സ്വകാര്യ ആശുപത്രിയില്‍ പ്രവേശിപ്പിച്ചു.

ജ്വല്ലറി ജീവനക്കാരനായ ബാബു സക്കറിയ ജോലി കഴിഞ്ഞ് ഭാര്യക്കൊപ്പം വീട്ടിലേക്ക് പോകുന്നതിനിടെയാണ് ഷോക്കേറ്റത്. ബൈക്ക് എത്തുന്നതിന് തൊട്ടു മുമ്പാണ് വൈദ്യുതി ലൈന്‍ റോഡില്‍ പൊട്ടി വീണിരുന്നത്. രാത്രിയായതിനാല്‍ ഇത് ബാബു കണ്ടിരുന്നില്ല. ബൈക്കില്‍ പോകുന്നതിനിടെ വൈദ്യുതി ലൈനിന്റെ ഭാഗം തട്ടിയാണ് ഷോക്കേറ്റത്. ഉടനെ നാട്ടുകാര്‍ അറിയിച്ചതിനെതുടര്‍ന്ന് കെഎസ്ഇബി അധികൃതര്‍ വൈദ്യുതി ലൈന്‍ ഓഫാക്കി.