പരസ്യമായി പൊതുറോഡില്‍ കേക്ക് മുറിച്ച് ജന്മദിനാഘോഷം; ഒന്നാം പ്രതി പിടിയില്‍

പത്തനംതിട്ട | വാഹനഗതാഗതം തടസ്സപ്പെടുത്തിയും പൊതുജനങ്ങള്‍ക്ക് ബുദ്ധിമുട്ട് സൃഷ്ടിച്ചും പൊതുനിരത്തില്‍ കേക്ക് മുറിച്ച് ജന്മദിനം ആഘോഷിച്ച യുവാക്കള്‍ക്കെതിരെ കേസ്. പത്തനംതിട്ട സെന്റ് പീറ്റേഴ്‌സ് ജംഗ്ഷനില്‍ ഇന്നലെ രാത്രി 9.15നാണ് യുവാക്കളുടെ സംഘം ഇത്തരത്തില്‍ ആഘോഷം നടത്തിയത്. സംഭവം സംബന്ധിച്ച് പത്തനംതിട്ട പോലീസ് കേസെടുത്ത് അന്വേഷണം ആരംഭിച്ചിരുന്നു, തുടര്‍ന്ന് ഇന്ന് ഒന്നാം പ്രതിയെ പിടികൂടി.

പത്തനംതിട്ട വെട്ടിപ്പുറം പുവന്‍പാറ ഓലികൂടെക്കല്‍ ഷിയാസ് ആണ് അറസ്റ്റിലായത്. ഇയാളുടെ ജന്മദിനാഘോഷമാണ് സുഹൃത്തുക്കളുടെ സംഘം ഒരുമണിക്കൂറോളം പൊതുവഴി തടഞ്ഞുകൊണ്ട് നടത്തിയത്. എസ് ഐ. ജിനുവിന്റെ നേതൃത്വത്തിലുള്ള പോലീസ് സംഘമാണ് ഷിയാസിനെ പിടികൂടിയത്.

ജില്ലാ പോലീസ് മേധാവിയുടെ നിര്‍ദേശത്തെ തുടര്‍ന്ന് അജിന്‍, ശ്യാം തുടങ്ങി ബാക്കിയുള്ള ഇരുപതോളം പ്രതികള്‍ക്കായി പോലീസ് അന്വേഷണം വ്യാപിപ്പിച്ചു.