ചെര്‍ണോബില്‍ ആണവനിലയത്തിന്‍റെ ചുമരുകളില്‍ ബ്ലാക്ക് ഫംഗസ്; ഇത് ശുഭസൂചനയോ?

കീവ് | ചെര്‍ണോബില്‍ ആണവനിലയത്തിന്‍റെ ചുമരുകളില്‍ വളരുന്ന ഒരു തരം കറുത്ത പൂപ്പല്‍ ശാസ്ത്രത്തിന് പുതിയ പ്രതീക്ഷ നല്‍കുന്നു. ആണവനിലയത്തിലുണ്ടായ ചോര്‍ച്ചക്ക് ശേഷം ഈ പ്രദേശങ്ങളില്‍ നിലനില്‍ക്കുന്ന അണുവികിരണം കാരണം‌ ജീവജാലങ്ങളുടെ എന്നല്ല ചെറുസസ്യങ്ങളുടെ പോലും നിലനില്‍പ് പ്രതിസന്ധിയിലായിരുന്നു. റേഡിയേഷനുണ്ടായ പ്രദേശങ്ങളിൽ ജീവജാലങ്ങള്‍ക്ക് നിലനില്‍ക്കാനാവില്ലെന്ന ധാണയെയാണ് അപൂര്‍വ്വമായ ക്ലാഡോസ്പോറിയം സ്ഫെറോസ്‌പെർമം എന്ന ഈ സൂക്ഷ്മ സസ്യം തിരുത്തിയെഴുതുന്നത്.

1986 ഏപ്രിൽ 26 നായിരുന്നു. അന്നത്തെ സോവിയറ്റ് സോഷ്യലിസ്റ്റ് യൂണിയന്‍റെ ഭാഗമായ ഉക്രയിനിലെ ചെര്‍ണോബില്‍ ആണവനിലയത്തില്‍ ചോര്‍ച്ചയുണ്ടാവുന്നത്. ആ സമയം 28 പേരുടേയും തുടര്‍ന്ന് റേഡിയേഷൻ മൂലമുണ്ടാകുന്ന കാന്‍സര്‍ കാരണം അര ലക്ഷത്തോളം‌ മനുഷ്യരും മരിക്കാനിടയായ വന്‍ ദുരന്തമായിരുന്നു അത്. അതിനു ശേഷം സസ്യജാലങ്ങള്‍ വരെ നശിച്ചുപോയ ഭൂമിയായിരുന്നു അവിടം. അവിടെയാണ് ഇപ്പോള്‍ ഈ ഫംഗസിനെ കണ്ടെത്തിയിരിക്കുന്നത്.

ബ്ലാക് ഫംഗസ് റേഡിയേഷനെതിരേ കാണിച്ച ശ്രദ്ധേയമായ പ്രതിരോധം ശാസ്ത്രത്തിന്‍റെ സവിശേഷ ശ്രദ്ധയ്ക്ക് പാത്രമായിരിക്കുന്നു. അതേകുറിച്ചുള്ള ചില പഠനങ്ങൾ സൂചിപ്പിക്കുന്നത് ഒരു മനുഷ്യനുള്ള മാരകമായ ഡോസിൻ്റെ 500 മടങ്ങ് വരെ ഇതിന് റേഡിയേഷനെ പ്രതിരോധിക്കാൻ കഴിയുമെന്നാണ്. ഈ ഫംഗസ് മെലാനിൻ ഉത്പാദിപ്പിക്കുന്നുണ്ട്. ഇതാണ് റേഡിയേഷൻ കേടുപാടുകളിൽ നിന്ന് സംരക്ഷിക്കാൻ സഹായിക്കുന്നത് എന്നാണ് നിഗമനം.

ഈ സസ്യം ഒരു അതുല്യമായ, ശാഖകളുള്ള പാറ്റേണിലാണ് വളരുന്നത്, ഇതും‌ ഉയർന്ന വികിരണ പരിതസ്ഥിതിക്ക് അനുയോജ്യമാണത്രേ. ഒപ്പം‌ ക്ലാഡോസ്‌പോറിയം സ്‌ഫെറോസ്‌പെർമം റേഡിയോ ആക്ടീവ് സീസിയം ശേഖരിക്കുന്നതായി കണ്ടെത്തിയിട്ടുണ്ട്. ഇത് ബയോറെമെഡിയേഷൻ ആവശ്യങ്ങൾക്കായി ഉപയോഗിക്കാം.

ഈ ഫംഗസിൻ്റെ റേഡിയേഷൻ-റെസിസ്റ്റൻസ് മെക്കാനിസങ്ങൾ കൂടുതലായി മനസിലാക്കാനുള്ള ശ്രമത്തിലാണ് ശാസ്ത്രജ്ഞർ. ഫംഗസിൻ്റെ മെലാനിൻ ഉൽപാദനത്തിൽ നിന്ന് പ്രചോദനം ഉൾക്കൊണ്ട് പുതിയ റേഡിയേഷൻ ഷീൽഡിംഗ് സാങ്കേതികവിദ്യകൾ വികസിപ്പിക്കാനുള്ള പദ്ധതികൾ പുരോഗമിക്കുന്നു. ഈ പരീക്ഷണങ്ങള്‍ വൈദ്യശാസ്ത്രം, കൃഷി, ബഹിരാകാശ പര്യവേക്ഷണം തുടങ്ങിയ മേഖലകളില്‍ പുതിയ പ്രായോഗിക സാധ്യതകള്‍ക്കുള്ള വഴി തുറക്കും. ഒപ്പം‌ റേഡിയേഷൻ പ്രതിരോധത്തെക്കുറിച്ചുള്ള പുതിയ ഉൾക്കാഴ്ചകളിലേക്ക് നയിക്കുമെന്ന് പ്രതീക്ഷിക്കുന്നു.

ക്ലാഡോസ്പോറിയം സ്ഫെറോസ്‌പെർമം എന്ന ഫംഗസ് അഥവാ കുമിള്‍ ആണവ ദുരന്തങ്ങൾക്കുള്ള ഒരു മരുന്നല്ലെങ്കിലും, ഏറ്റവും വെല്ലുവിളി നിറഞ്ഞ സാഹചര്യങ്ങളിൽ പൊരുത്തപ്പെടാനും അതിജീവിക്കാനുമുള്ള ജീവൻ്റെ കഴിവിൻ്റെ ശ്രദ്ധേയമായ ഉദാഹരണമാണിത്. അതിൻ്റെ കണ്ടെത്തൽ ഗവേഷണത്തിന് പുതിയ വഴികൾ തുറക്കുമെന്ന് തീര്‍ച്ച. ആണവ ദുരന്തങ്ങൾ ബാധിച്ച പ്രദേശങ്ങളുടെ പരിഹാരത്തിനും പുനരുജ്ജീവനത്തിനും ഇതൊരു പുത്തന്‍ പ്രതീക്ഷ നൽകുന്നു.