Uae
വഴിയില്‍ ഉപേക്ഷിക്കപ്പെട്ട് ബ്രിട്ടീഷ് പൗരന്; തുണയായി മലയാളി സാമൂഹിക പ്രവര്‍ത്തകന്‍
താമസിക്കാന്‍ ഇടമില്ലാതെ റോഡരികില്‍ കിടന്നിരുന്ന ഇയാളെ ദുബൈ കമ്മ്യൂണിറ്റി പോലീസ് വളണ്ടിയറായ നിസാര്‍ ഖാലിദ് എത്തിയാണ് റാഷിദിയ ആശുപത്രിയിലേക്ക് മാറ്റിയത്.
ദുബൈ | ആരോരുമില്ലാതെ രോഗാവസ്ഥയില്‍ ദുബൈയിലെ തെരുവില്‍ ഉപേക്ഷിക്കപ്പെട്ട ബ്രിട്ടീഷ് പൗരന് തുണയായി മലയാളി സാമൂഹിക പ്രവര്‍ത്തകന്‍. താമസിക്കാന്‍ ഇടമില്ലാതെ റോഡരികില്‍ കിടന്നിരുന്ന ഇയാളെ ദുബൈ കമ്മ്യൂണിറ്റി പോലീസ് വളണ്ടിയറായ നിസാര്‍ ഖാലിദ് എത്തിയാണ് റാഷിദിയ ആശുപത്രിയിലേക്ക് മാറ്റിയത്.
മൂന്ന് ദിവസങ്ങള്‍ക്കു മുമ്പാണ് യു കെ മാഞ്ചസ്റ്റര്‍ സ്വദേശി 72 കാരനായ റൊണാള്‍ഡ് ഹാര്‍ളി ബര്‍ദുബൈയിലെ റോള സ്ട്രീറ്റില്‍ ടാക്സിയില്‍ വന്നിറങ്ങുന്നത്. കടുത്ത പ്രമേഹത്തെ തുടര്‍ന്ന് നടക്കാനാവാത്ത വിധം കാലുകളില്‍ വൃണമുള്ള ഇയാള്‍ വീല്‍ചെയറിലാണ് എത്തിയത്. റൊണാള്‍ഡ് പറഞ്ഞ മേല്‍വിലാസത്തിലുള്ള കെട്ടിടത്തിലേക്ക് ടാക്സി ഡ്രൈവര്‍ എത്തിച്ചെങ്കിലും അവിടെ സ്വീകരിക്കാന്‍ ആരുമുണ്ടായിരുന്നില്ല. ഒടുവില്‍ ഡ്രൈവര്‍ തൊട്ടടുത്തുള്ള കഫ്റ്റീരിയക്ക് അടുത്ത് വീല്‍ ചെയറില്‍ ഇയാളെ ഇരുത്തി സ്ഥലം വിട്ടു.
മണിക്കൂറുകളോളും ഒരാള്‍ വീല്‍ ചെയറില്‍ ഇരിക്കുന്നത് കണ്ട കഫ്റ്റീരിയ മാനേജര്‍ ഉനൈസ് വിവരമന്വേഷിച്ചു. കൂട്ടാന്‍ ബന്ധു വരുമെന്ന് പറഞ്ഞുവെങ്കിലും രാത്രി ഏറെ വൈകിയിട്ടും റൊണാള്‍ഡിനെ അന്വേഷിച്ച് ആരുമെത്തിയില്ല. രണ്ടാം ദിവസവും ഇങ്ങനെത്തന്നെ പോയി. ആരും വരുന്നില്ലെന്ന് മനസ്സിലാക്കിയ കഫ്റ്റീരിയ ജീവനക്കാര്‍ ഭക്ഷണവും ബ്ലാങ്കറ്റും മറ്റും നല്‍കി ഇയാളെ സഹായിച്ചു. മൂന്നാം ദിവസം പോലീസില്‍ വിവരമറിയിച്ചു. പൊലീസും ആംബുലന്‍സും സ്ഥലത്തെത്തിയെങ്കിലും റൊണാള്‍ഡ് കൂടെ പോവാന്‍ കൂട്ടാക്കിയില്ല. ബന്ധുക്കള്‍ വരുമെന്ന് പറഞ്ഞ് വാശിപിടിച്ച് അവിടെ തന്നെയിരുന്നു.
പ്രാഥമിക കര്‍മങ്ങള്‍ നിര്‍വഹിക്കാനായി എഴുന്നേറ്റ് നടക്കാന്‍ പോലും ഇയാള്‍ക്ക് കഴിഞ്ഞിരുന്നില്ല. പിന്നീട് പരിസരത്തുള്ളവര്‍ കെ എം സി സി വളണ്ടിയര്‍ വിഭാഗവുമായി ബന്ധപ്പെടുകയായിരുന്നു. തുടര്‍ന്ന് ദുബൈ കോടതിയില്‍ ജോലി ചെയ്യുന്ന കണ്ണൂര്‍ മട്ടന്നൂര്‍ സ്വദേശി നിസാര്‍ ഖാലിദ് സ്ഥലത്തെത്തി റൊണാള്‍ഡിനെ ദുബൈ ആംബുലന്‍സിന്റെ സഹായത്തോടെ റാഷിദിയ ആശുപത്രിയിലേക്ക് മാറ്റി. നിസാര്‍ ഏറെ നേരം സംസാരിച്ച് കാര്യങ്ങള്‍ ധരിപ്പിച്ച ശേഷം മാത്രമാണ് അവിടെ നിന്നും മാറാന്‍ റൊണാള്‍ഡ് തയ്യാറായത്.
പരസ്പര വിരുദ്ധമായ കാര്യങ്ങളാണ് ഇയാള്‍ പറയുന്നത്. ബ്രിട്ടീഷ് പാസ്പോര്‍ട്ടുള്ള റൊണാള്‍ഡിന് 90 ദിവസത്തെ വിസയുണ്ട്. ദുബൈയിലെ ഏതോ ഹോട്ടലില്‍ താമസിച്ചിരുന്ന റൊണാള്‍ഡിനെ ആരോരുമില്ലെന്നറിഞ്ഞതോടെ ഉപേക്ഷിച്ചതാവാമെന്നാണ് കരുതുന്നത്. അവധി ദിവസം കഴിഞ്ഞാല്‍ ബ്രിട്ടീഷ് എംബസിയുമായി ബന്ധപ്പെട്ട് റൊണാള്‍ഡിനെ നാട്ടിലേക്ക് അയക്കാന്‍ നടപടി സ്വീകരിക്കുമെന്ന് നിസാര്‍ ഖാലിദ് പറഞ്ഞു.
Latest
ഭാര്യയുമായി അവിഹിത ബന്ധം സംശയിച്ച് സുഹൃത്തിനെ കൊന്ന് പെട്ടിയിലാക്കി ഉപേക്ഷിച്ചു
അമേരിക്കന്‍ വിമാനാപകടത്തില്‍ അസ്വാഭാവികത തുറന്നു പറഞ്ഞ് പ്രസിഡന്റ് ഡോണള്‍ഡ് ട്രംപ്
ഓടുന്ന ബസില്‍ നിന്ന് റോഡിലേക്ക് തെറിച്ചുവീണ വൃദ്ധമരിച്ചു
പൂക്കോട് വെറ്ററിനറി കോളജിലെ സിദ്ധാര്‍ഥന്റെ മരണം; പ്രതികള്‍ക്ക് പഠനം തുടരാന്‍ സര്‍വകലാശാല ഉത്തരവ്
ലഹരി, സൈബർ ക്രൈം: ജില്ലാ പോലീസ് ആസ്ഥാനങ്ങളിലേക്ക് നാളെ എസ് എസ് എഫ് മാർച്ച്
വഴിയില്‍ ഉപേക്ഷിക്കപ്പെട്ട് ബ്രിട്ടീഷ് പൗരന്; തുണയായി മലയാളി സാമൂഹിക പ്രവര്‍ത്തകന്‍
