വണ്ടിപ്പെരിയാര്‍ പെണ്‍കുട്ടിയുടെ പിതാവിനെ കുത്തിയ കേസ്; പ്രതി പാല്‍രാജ് അറസ്റ്റില്‍

ഇടുക്കി|വണ്ടിപ്പെരിയാറില്‍ പീഡനത്തിനിരയായി കൊല്ലപ്പെട്ട പെണ്‍കുട്ടിയുടെ പിതാവിനും മുത്തച്ഛനും കുത്തേറ്റ സംഭവത്തില്‍  പ്രതി അറസ്റ്റില്‍.  കേസില്‍ കുറ്റവിമുക്തനാക്കപ്പെട്ട അര്‍ജുന്റെ ബന്ധുവായ പാല്‍രാജിനെയാണ് പോലീസ് കസ്റ്റഡിയിലെടുത്തത്. വണ്ടിപ്പെരിയാര്‍ ടൗണില്‍വെച്ചാണ് കുട്ടിയുടെ പിതാവിനും മുത്തച്ഛനും കുത്തേറ്റത്. ഇരുവരെയും കുത്തിയ ശേഷം പ്രതി പാല്‍രാജ് ഓടിരക്ഷപ്പെടുകയായിരുന്നു. പിന്നീട് ഇയാളെ പോലീസ് പിടികൂടുകയായിരുന്നു.

വണ്ടിപ്പെരിയാറിലെ പശുമലയില്‍വെച്ചാണ് ആക്രമണം നടന്നത്. കുട്ടിയുടെ പിതാവും മുത്തച്ഛനും ബൈക്കില്‍ പോകുകയായിരുന്നു. ഈ സമയം പാല്‍രാജ് ഇവരെ അശ്ലീല ആംഗ്യം കാണിച്ചു. ഇരുവരും ഇത് ചോദ്യം ചെയ്തതോടെ പാല്‍രാജ് കുട്ടിയുടെ പിതാവിനെ കുത്തുകയായിരുന്നു. ഒപ്പമുണ്ടായിരുന്ന മുത്തച്ഛനും പരിക്കേറ്റു. കുട്ടിയുടെ പിതാവിന്റെ കാലുകളുടെ തുടക്കാണ് കുത്തേറ്റത്. നെഞ്ചിലും പരിക്കുണ്ട്.

പെണ്‍കുട്ടിയുടെ പിതാവും മുത്തച്ഛനും പീരിമേട് താലൂക്ക് ആശുപത്രിയിലാണ് ചികിത്സ തേടിയിരുന്നത്. ഇവരെ ഇടുക്കി മെഡിക്കല്‍ കോളജിലേക്ക് മാറ്റി. ഇരുവരുടെയും ആരോഗ്യനില തൃപ്തികരമാണെന്നാണ് വിവരം.