ലക്ഷദ്വീപ് എം പിക്കെതിരെ സി ബി ഐ കേസെടുത്തു

ന്യൂഡൽഹി | ലക്ഷദ്വീപ് എം പിയും എൻ സി പി നേതാവുമായ മുഹമ്മദ്​ ഫൈസലിനെതിരെ സി ബി ഐ കേസെടുത്തു. ടൂണ മത്സ്യം കയറ്റുമതിയിൽ ക്രമക്കേട് കണ്ടെത്തിയെന്ന് അവകാശപ്പെട്ടാണ് സി ബി ഐ ലോക്സഭാ അംഗത്തിനെതിരെ കേസെടുത്തത്. ലക്ഷദ്വീപ്​ കോഓപറേറ്റീവ്​ മാർക്കറ്റിംഗ്​ ഫെഡറേഷൻ ലിമിറ്റഡ് ​(എൽ സി എം എഫ്​) മുഖേന സംഭരിച്ച ഉണക്ക ടൂണ മൽസ്യം ശ്രീലങ്കയിലേക്ക്​ കയറ്റുമതി ചെയ്തതിൽ ഒമ്പത്​ കോടി നഷ്ടം സംഭവിച്ചുവെന്നാണ് സി ബി ഐ പറയുന്നത്. അഞ്ച് വർഷം മുമ്പാണ് ഇക്കാര്യങ്ങൾ നടന്നത്.​

ഫൈസലിന്‍റെ ബന്ധുവും ശ്രീലങ്കൻ കമ്പനിയുടെ പ്രതിനിധിയുമായ മുഹമ്മദ്​ അബ്​ദുർറാസിഖ്​​ തങ്ങൾ, ശ്രീലങ്കയിലെ കയറ്റുമതി കമ്പനിയായ എസ്​ ആർ ടി ജനറൽ മർച്ചന്‍റ്​ ഇംപോർ​ട്ടേഴ്​സ്​ ആൻഡ്​ എക്സ്​പോർട്ടേഴ്​സ്, ലക്ഷദ്വീപ്​ കോഓപറേറ്റീവ്​ മാർക്കറ്റിംഗ് ഫെഡ​റേഷൻ ലിമിറ്റഡ്​ മാനേജിംഗ്​ ഡയറക്ടർ എം പി അൻവർ എന്നിവരും കേസിൽ പ്രതികളാണ്​. ജൂൺ 24ന്​ കവരത്തിയിലെ എൽ സി എം. എഫ് ഓഫിസിലും കോഴിക്കോട്ടും മിന്നൽ പരിശോധന നടത്തിയിരുന്നു.

2016- 17 കാലയളവിൽ നടന്ന സംഭവവുമായി ബന്ധപ്പെട്ട്​ രഹസ്യവിവരം കിട്ടിയതി​ന്‍റെ അടിസ്ഥാനത്തിലായിരുന്നു ഈ പരിശോധന.  തുടർന്ന് ന്യൂഡൽഹിയിലെ സി ബി ഐ ഓഫിസറുടെ പരാതിയിൽ കേസെടുക്കുകയായിരുന്നു. ലക്ഷദ്വീപ് അഡ്മിനിസ്ട്രേറ്റർ പ്രഫുൽ പട്ടേലിൻ്റെ ജനവിരുദ്ധ പരിഷ്കാരങ്ങൾക്കെതിരെ എം പിയുടെ നേതൃത്വത്തിൽ വൻ പ്രതിഷേധം സംഘടിപ്പിച്ചിരുന്നു.